WASHINGTON - Ikhomishini ebona ngezokhetho eyeZimbabwe Electoral Commission ithi uhlelo lokubhalisela ukuvota luqale namuhla endaweni ezitshiyeneyo.
I-ZEC, eyethule umbiko lo enkundleni yeTwitter, ithi kulendawo ezingamatshumi ayisikhombisa lantathu – 73 ezivulelwe uzulu ukuba abhalisele ukuvota kukhetho oluzayo.
Uhlelo lolu luzaqhutshwa okwensuku ezilitshumi. Amabandla azancintisa kukhetho oluzakwenziwa lonyaka athi adinga abantu abazabhalisela ukuvota.
UMnu. Ostallos Siziba, umsekeli wesikhulumeli sebandla leCitizens Coalition for Change elikhokhelwa nguMnu. Nelson Chamisa, uthi bafisa ukuba uChamisa avotelwe ngabantu abayizigidi eziyisithupha – 6 million.
Ibandla leZanu PF lona lidinga amavoti ayizigidi ezinhlanu akaMongameli Emmerson Mnangagwa, ozamelimela kukhetho oluzayo.
UMnu. Mabutho Moyo uthi luqakathekile ukhetho lolu ngakho-ke sebekhankasela amavoti la elizweni lonke.
UMoyo uthi bakhuthaza ukuthula lonyaka ngesikhathi sokhetho.
UMnu. Ambrose Sibindi, okunhlanganiso yeBulawayo Progressive Residents Association, uthi okwamanje athwele nzima amabandla aphikisayo azama ukukhankasela ukhetho oluzayo.
USibindi uphinde wathi wonke amabandla kumele avunyelwe ukusebenzisa imisakazo edlelana lohulumende.
EleZimbabwe likhangelelwe ukuba lizakwenza ukhetho phakathi kuka Ntulikazi loNcwabakazi. UMnangagwa uzakwethula okusemthethweni usuku lokhetho.