GWANDA - Abalimi bemaphandleni emangweni weMatabeleland South sebekhuthaze uhulumende ukuthi abakhumbule lapho esabela abanye amathalakitha ukuze balime ngokugcweleyo labo bathole isivuno esithe xaxa.
Lanxa uhulumende eke wanikeza ugatsha lweDistrict Development Fund (DDF) kanye lebhanga elisekela abalimi eleAgribank amathalakitha, abalimi abanengi kulumhlubulo bathi kabakaze bawabona.
Ngenyanga edlulileyo, umphathintambo wezokulima uMnu Anxious Masuka, ubike ukubana eleZimbabwe lizasebenzelana leleIran ekuthuthukiseni inhlelo zokulima eZimbabwe, esithi uhulumende uzathenga amathalakitha kulelolizwe ukuze aphathise abalimi.
UMongameli weleBelarus uMnu Alexander Lukashenko laye uthembise ngenyanga ephelileyo ngesikhathi eseHarare ukuthi ilizwe lakhe lizaphathisa eleZimbabwe ngamathalakitha lokunye okokuthuthukisa ezokulima.
Kodwa abalimi abaxoxe lomsakazo weStudio 7 ezansi yeMaNdebeleni bathe inhlelo zikahulumende zamathalakitha bazizwa ngelikabathi kulesisabelo kungakho befuna ukuthi labo bakhunjulwe lapho esabiwa.
UMnu. Elias Dube, oyisakhamuzi seNsimbi, eGaranyemba, oleminyaka yokuzalwa engamatshumi ayisitshiyangalombili lambili, 82, uthi kaselawo amandla okulima ngekhuba kodwa inhlelo zamathalakitha ziyabeqa.
"Insimu sengayabela abantwana ngoba ngibona ngingasakwanisi kangako," kutsho uMnu Dube. "Amathalakitha siyawadinga kodwa into ekhona yikuthi ayafika afikele lapho okuvele kuphelela khona izinto."
Uqhubeke wathi, "Sifisa ukuthi wonke umuntu alingane ukuthi nxa izinto zingafika ziye esandleni salo lalo oyisizalwane seZimbabwe."
Amazwi kaDube agcizelelwe nguMnu. Gabriel Moyo, oyisakhamuzi seMawane phansi kweNduna uNhlamba, yena othi bayawadinga amathalakitha ngamehlo abomvu.
"Siyakuzwa sikuzwela kwabanye ukuthi uhulumende unika amathalakitha okulima, singazi ukuthi unika kuwaphi amakhaya, lapha angikaze ngizwe umuntu ekhuluma ngakho," uMoyo utshele umsakazo weStudio 7.
"Khona vele kubalulekile ukuthi uhulumende anike abantu amathalakitha ngoba nyakenye abantu balime nzima. Izifuyo bezicake kakhulu kodwa kungaba ngcono nxa singathola amathalikitha angasincedisa."
UNkosikazi Thokozile Dube ohlala kuWard 20 eMzingwane yena uthe abaqedanga ukulima ngoba besebenzisa inkabi.
"Sibili siyawafuna amathalikitha okuthi silime emasimini, ngikhuluma nje kathesi asenelisanga ukuthi siqede ukulima emasimini ngenxa yokuthi izulu liyakwanisa ukuthi line kanye lihamba," kutsho uMaDube.
"Pho nxa silima ngenkabi siyalima okwamalanga amalutshwane sokomile kanti ke ithalakitha iyalima iphutshe ukuthi izulu nxa libuya sihlanyele njalo amasimu ethu singawalima siwaphutshe."
UMnu. Zwelithini Gabula oyisakhamuzi seSitezi phansi kweNduna uMathema yena uthe lanxa sezike zabafinyelela inhlelo zamathalakitha, okudanisayo yikuthi kusuka kukhethwanwe ngezombangazwe.
Uthe: "Yikuthi inhlelo ezinje zivame ukuthi ziphelele kwabaphezulu loba kwesinye isikhathi uthola sezigijinyiswa ngokulandela ibandla elibusayo ufice ukuthi abanye abantu abasangeni kulezo nhlelo zokulinyelwa."
Uhulumende useke wakulandula kanengi-nengi ukuthi amathalakitha aphiwa amalunga ebandla leZanu PF kuphela esithi inhlelo zokulima ziqondiswe kuzulu jikelele kungakhathalekile ukuthi umuntu usekela liphi ibandla lezombusazwe.
