HARARE - UMnu. Robert Scott, umsekeli kanobhala obona ngezobudlelwano beMelika lamazwe awezwekazi leAfrica owethekeleleni eZimbabwe, uthi ilizwe lakhe lizasekela umsebenzi wokuqhutshwa kokhetho lwalonyaka, okugoqela ukusekela intathelizindaba lenhlanganiso ezizimeleyo.
Ekhuluma emhlanganweni lentathelizindaba esigodlweni sommeli weMelika eZimbabwe, uScott uthe kunengi okudingakalayo ukuze lizwe libuyele kusimo sokuhlonitshwa ngamazwe womhlaba.
“Sifuna ukusekela inhlangothi zokuba kube lokhetho olukhululekileyo. Asisekeli amabandla sisekela inhlangothi zika hulumende ukuze ukhetho lukhululeke.”
Uqhubeke ithi eleZimbabwe kumele lincedisane lele Melika lamazwew onke ukuze lenelise ukubhadalela izikwelede zalo lithole amathuba okukhweleda eyinye imali yokuthuthukisa ilizwe.
“Kuqakathekile ukuba kukhulunywe ngodaba lwesikwelde seZimbabwe. Kuqakathekile ukuba sikhulume labanengi elizweni leli.”
Uphinde waxwayisa uhulumende ngomthetho wePrivate Voluntary Organisation (PVO) Bill esithi uzaphazamisa isimo selizwe njalo kungafakela amanye amazwe agoqela elakhe imigoqo yokuncedisa inhlangothi ezitshiyeneyo zempilo ezingelani lezombusazwe.
Lokhu kusekelwe nguMnu. Ostallos Siziba, owebandla le CCC.
“Sivumelana laye ngaloludaba ngoba kumele kulungiswe ukuba umthetho we Zimbabwe uqinisiswe ukuze amalungelo oluntu ahlonitshwe kuleli.”
Kodwa Ilunga leCentral Committee yeZANU PF, uMnu Munashe Mtutsa, uthi okuphazamisa intuthuko ye Zimbabwe yizijeziso eyazetheswayo ngamazwe angentshonalanga.
“Kumele uhulumende akhiphe izijeziso zomnotho ezabekelwa ele Zimbabwe. Akula ngenye indlela uhulumende angasebenza ngayo nxa kulezijeziso lezi.”
Lumthetho owePVO Bill usumelele nje ukuthi usayinwe nguMongameli Emmerson Mnangagwa ukuthi uqale ukusebenza kungakhathelekile ukuthi usolwa ngabanengi emhlabeni jikelele okugoqela leMelika.
UScott namhlanje ntambama ukhangelelwe ukuhlangana labamabandla aphikisayo ngemva kokukhulumisana lentathelizindaba, uhulumende lenhlanganiso ezizimeleyo. Uphinde wathi kulabantu abanengi abavela eMelika abazaqhubeka besiza kwele Zimbabwe ukuzekhangelisisa ukuhlonitshwa kwamalungelo oluntu.