HARARE - Umsekeli kanobhala obona ngezobudlelwano beMelika lamazwe ewezwekazi leAfrica, uMnu Robert Scott, uthi kumele eleZimbabwe liqhube ukhetho olukhululekileyo lonyaka.
UScott ukhuthaza njalo uhulumende ukuba akhiphe umthetho obunjwayo olawula umsebenzi wenhlanganiso ezizimeleyo owePrivate Voluntary Organizations Bill (PVO Bill) ngoba uthi uvimba ukusebenza kwazo ngokukhululekileyo.
UScott, ofike eZimbabwe ngoLwesithathu, wenze linkuthazo ngoLwesine eHarare ngemva kokuhlangana lomphathimbo obona ngobudlelwano beZimbabwe lamanye amazwe, uMnu. Fredrick Shava.
Uqhubeke esithi utshele uhulumende ukuba eleZimbabwe kumele liqhube ukhetho olukhululekileyo ngoba kuyiyo yodwa indlela yokulungisisa indubo ezibhekane lelizwe.
“Sikhulume ngokunengi okugoqela indaba yeAFDB (African Development Bank), sikhulume ngokhetho ukuba kungabi lodlakela, kube lokhetho olukhululekileyo njalo ukuba kulungiswe umthetho wePVO.”
Ekhuluma ngemva kwakulumhlangano, uMnu, Fredrick Shava, uthe eleZimbabwe lizimisele ukulungisa ubudlelwano phakathi kwalo lele Melika.
“Sifuna ukuba kulungiswe ubungane phakathi kwele Zimbabwe lele Melika. Silethemba lokuba ukuhlangana kwethu kumele kulungise lokho okusihluphayo.”
Kuhambo lwakhe, uScott uzahlangana labamabandla aphikisayo labenhlanganiso ezizimeleyo ngoLwesihlanu esigodlweni sommeli weMelika kuleli.
Kusenjalo, uhulumende wakwele Melika usengeze izijeziso zenotho ezetheswa inkokheli yebandla leZanu PF lamankampani okuthiwa akhuthaza ubudlwangudlwangu elizweni leZimbabwe.
EleMelika lithi akula okuveza ukuba uhulumende kaMongameli Emmerson Mnangagwa uzimisele ukuguqula indlela abusa ngayo.
Ingcwethi ezicubungula ezombusazwe kanye labamabandla aphikisayo bathi ukuqheliswa kwesikhathi sezijeziso zomnotho kuveza sobala ukuba uhulumende kaMnangagwa kakagcwalisi okukhuthazwa ngamazwe athuthukileyo ukuze atshengise ukuba wehlukene lohulumende kowayengumongameli umuyi uRobert Robert Mugabe, andubana zikhitshwe lezi zijeziso.
Umsekeli wesikhulumeli sebandla leCitizens Coalition for Change, uMnu. Gift Ostallos Siziba, uthi kumele uhulumende alungise udaba kwenkohlakalo elizweni.
“Sibona engani kumele kulungiswe udaba lokuhlonitshwa kwamalungelo kazulu. Silungise ubudlelwano bethu lamazwe wonke omhlaba ukuze eleZimbabwe liphenduke emhlabeni wonke jikelele.”
Lokhu kusekelwe yisikhulumeli sebandla leZAPU, uMnu. Msongelwa Ndlovu, othi uhulumende kazimiselanga ukuguqula indlela abusa ngayo.
“Akusimangalisi ukuba bazaqhubeke bejezisa iZimbabwe ngoba abantu ababusa eZimbabwe itsho ukuba bayakhitshwa embusweni. Babusa ngokuncindezelwa babusa ngamandla.”
Kodwa isikhulumeli sebandla leMDC-T, uMnu. Witness Dube ,uthi izijeziso lezi zinika uhulumende izizatho zokwehluleka ukulungisa umnotho.
“Uhulumende weMelika wenza lokho ukulungele eleMelika. Sibona engathi udaba lolu olwama sanctions solwenza uhulumende athole into yokuvika ngayo.”
Izijeziso zomnotho lezi zabekelwa inkokheli yebandla leZanu PF ngomnyaka ka2003 ngenxa yokungahloniphi amalungelo oluntu kulandela ukuhluthunela abamhlophe amapulazi.
Uhulumende weZimbabwe uthi izijeziso lezi zafakwa ngoba wayesethethele abamhlophe amapulazi wawanika abantu abansundu.