Sokulomnyaka eleRussia lahlasela eleUkraine lisithi lizondiswe ngokwenziwa ngamazwe akumanyano weNorth Atlantic Treaty Organization (NATO), onika ilizwe leli izikhali ezethusayo.
EleRussia lithi lizaqhubekela phambili lihlasela eleUkraine lize likhulule ezinye indawo elazihluthuna lisithi ngelo.
Abezindaba abeReuters babika ukuba uMongameli Volodymyr Zelenskyy utshele abakubutho lozulu ukuba bazanqoba eleRussia empini le, okulabantu abanengi asebetshabalele kwathi abanye babalekela kwamanye amazwe.
EleRussia selabhidliza izakhiwo ezinengi ezigoqela izindlu emadolobheni lemaphandleni. Amazwe entshonalanga asenike eleUkraine izikhali ezinkulu njalo lemali yokunakelela iziphepheli labanye ababaleka kwele Ukraine, abedlula izigidi ezilitshumi – 10 million.
Abanye ababaleka kwele Ukraine ngabadabuka eZimbabwe asebehlala kwamanye amazwe. Kulabanye ababuyela eZimbabwe besithi bafisa ukuqhubekela phambili ngezifundo zabo.
Kusenjalo, abakumanyano weGroup of 7 baqoqe umhlangano ngoLwesihlanu wokufakela abasekela eleRussia izijeziso zenotho.
EleMelika lithi akumelanga eleChina selizama lisekele eleRussia ngokulinika izikhali ezinkulu.
UMongameli Joseph Biden usanda kwethusela eleChina esithi lizawukhomba umuzi olotshwala linganika eleRussia izikhali.
UBiden uthi eleMelika lizasekela uhulumende kaZelenskyy ohlaselwa ngele Russia.
Lokhu kwenze uMnu. Vladmir Putin, umkhokheli wakwele Russia, asuse ilizwe lakhe kuvizumelwano seNew Strategic Arms Reduction Treaty.
Isivumelwano lesi sesimise ukulolonga izikhali ezintsha ze-nuclear lokuzifaka endaweni lapho ezimelele ukusetshenziswa.
Ingcwethi ezibona ngokulungiswa kwezikhali zithi sokuzajahwa emhlabeni wonke jikelele ukulungiswa kwezikhali ze-nuclear.
Bayakhala eZimbabwe ngempi le abathi yenza kubelokusilela kwengqoloyi lokunye ukudla.
UMnu. Masimba Kuchera, ingcwethi kwezenotho, uthi impi le ithwalise nzima abantu emhlabeni wonke jikelele ngenxa yokuthi sokusilela amafutha ezimota, imvundiso ye-fertilizer lokunye.
“Ngingathi mina impi yase-Russia le-Ukraine, ibangele ukuthi intengo yamafutha awe-petrol le-diseal iqonge kakhulu. Lapha eZimbabwe okungela magetsi khona siyakwazi ukuthi ama-industry amanengi asebenzisa i-diseal nxa kungela magetsi. So ukuqonga kwentengo leyi kwenza ukuthi intengo yezinto ezinengi kakhulu layo ikhwele.”
Abakubandla eleZanu PF bathi kukhanya emanengi okwamanje amazwe asekela okwenziwa ngele Russia kwele Ukraine. UMnu. Believe Gaule ngomunye wabalombono lo.
“I-Russia layo isilabangane bayo asebeyibona ukuthi hayi, lapha isithelelwa ikakhulu iChina leNorth Korea. Zingangenela iChina leNorth Korea lapha entweni leyi, kuzacina sekuphuma into esiyibala sisithi yi-3rd World War. I-3rd World War izakuba khona nxa into leyi ingasabanjwanga kahle. Kodwa-ke okukhona yikuthi khathesi sikhangelele ukuthi mhlawumbe bona oChina bengancedisa ekutheni kube le-cease fire.”
UMnu. Gift Ostallos Siziba, umsekeli wesikhulumeli sebandla leCitizens Coalition for Change, bafisa ukuba kubelokuthula emhlabeni wonke jikelele hatshi impi.
“… Thina sibona ukuthi into eqakathekileyo yikubana kube lokukhulumisana ukuze kulungiswe udaba lwempi ephakathi kwele Ukraine lele Russia.”