Abantu abathengisela esitaladini sika 5th avenue koBulawayo, ababikwa bevela kwezinye izigaba zelizwe njalo besekelwa libandal leZanu pf babikwa besethesa icala ibandla le CCC ukuthi yilo elikhuthaze amapholisa ukuthi axotshe abathengisayo laba.
Kubikwa kulimele abanye abathengisayo lamapholisa kamanisipala.
Isikhulumeli sekhansili yakoBulawayo uNkosikazi Nesisa Mpofu utshele iStudio 7 ukuthi abanye abathengisayo laba balala ezitaladini, okuyikwephula imithetho yalelodolobho.
Uphinde wathi balethemba lokuthi umkhankaso abawusungule izolo owokududula lababantu uzaphumelela.
Isikhulumeli sebandla le CCC ko Bulawayo, uMnu. Swithern Chirowodza utshele iStudio Seven ukuthi akuqondanga ukwethesa icala ibandla le CCC ngoba uhlelo lokududula abathengisayo laba lwasungulwa nguhulumende.
Njengoba iStudio Seven ingasekeli hlangothi, sixoxe lesiphathamandla sebandla le Zanu PF, uMnu. Joseph Tshuma uthi ngamanga ukuthi abantu laba ngamalunga ebandla le Zanu PF.
Inhlanganiso yezisebenzi, iZCTU, isisole ukudutshulwa kwabantu abaphila ngokuthengisa abathathu kobulawayo izolo ngesikhathi amapholisa kamanisipala kanye lakahulumende ebaxotsha lapho abathengisela khona esithi basebenza ngaphandle komthetho.
Amapholisa athi abantu laba badutshulwe zinhlamvu ze-rubber njalo balaliswe esibhedlela.
Umanisipala laye uthi kulezisebenzi zakhe ezintathu ezilimeleyo. Sixoxe lesiphathamandla seZCTU uMnu Ambose sibindi.
Izakhamizi zakoBulawayo zithi kuyadanisa ukuthi ikhansili yalelidolobho ayilamandla yokuxotsha kokuphela abathengisa impahla ezehlukeneyo phakathi kwalelidolobho bengalamvumo, njengalokho okwenzakale izolo baze bebuyele endaweni zabo zokuthengisela ngemva kokududulwa ngamapholisa kamanisipala.
USithandekile Mhlanga weStudio 7 uxoxe loMnu. Austin Nkomazana, okhokhela ugatsha olubona ngezamabhizimusi kunhlanganiso yeBulawayo Progressive Residents Association, ukuze sizwe okunengi ngaloludaba.