BULAWAYO - Kuqhamuke inxabanxoza enzikini yedolobho koBulawayo, kwalimala abanye abaphila ngokuthengisa ngesikhathi bexotshwa lapho abathengisela khona okungekho emthethweni ngamapholisa ekhansili kusukela emathathakusa ngoLwezine.
Amapholisa ekhansili yako Bulawayo asungule uhlelo lwabo ngehola lesine emadabukakusa bethathela abaphila ngokuthengisa okungekho emthethweni enzikini yedolobho emkhambo owe Fifth Avenue Market, okulapho okuqhamuke udlakela lokulwisana kwamacele womabili.
Ngezikhathi zabo 7 ekuseni abanye babaphila ngokuthengisa abakade bezithi ngamalunga awe Zanu PF, baqale ukubuthana bacina befola betshengisela behlabela beqonde eCity Hall.
Lapho befola abeStudio 7 babone abanye babo bagijimele ezimotheni zamapholisa bephosela amatshe okwesikhathi esifitshane kwahle kwafika amapholisa awezomvikela aweRiot Police.
Omunye obebikwa engumgcinisihlalo wexuku leli uzame ukubakhuza ukuthi bengenzi udlakela kodwa watshela intathelizindaba ukuthi abeZanu PF kabaluthakazaleli uhlelo lwekhansili ebunjwa ngamakhansila awebandla eliphikisayo eleCCC leleMDC.
Uthe baphambanisa abantu abazisebenzayo ngoba kungela misebenzi kuyiyo kuphela indlela yokuselela imuli zabo.
UNkosikazi Nyarai Shoko, ophila ngokuthengisa, ngomunye wabasola inyathela leKhansili leli.
“Ikhansili ayiyenzi kuhle ngabe balindile abanikazi bempahla babuya ekuseni hatshi ukuhlanganisa wonke umuntu bethatha impahla.”
Isakhamuzi sakoBulawayo, uMnu Donald Khumalo, usola asebethumbe idolobho.
“Kanti ngubani osewapha imvumo kubantu bokuza ukuthi bathathe idolobho bazabele behlawulise abantu yena uBulawayo ekhona.”
NgoMvulo emhlanganweni wokuphuma lamasu okutholisa abathengisayo indawo zokuthengisela kuphume inkuthazo yokuthi ikhansili ilandele umthetho hatshi ukuyekela abantu bengcolisa idolobho ebelisaziwa ngokuhlanzeka.
Umphathintambo wamabhizimusi amancane, uNkosikazi Sithembiso Nyoni, ngomunye wabaphe linkuthazo.
“Ikhansili ilamandla ewaphiwa yisisekelo selizwe lemithetho yokulawula idolobho ngakhokhe bambani umthetho libophe labo abephula umthetho labathumba idolobho.”
Isikhulumi sekhansili, uNkosikazi Nesisa Mpofu, Uthi, “Siphakathi kohlelo lokususa bonke abangelamvumo yokuthengisela enzikini yedolobho buye besivele sihlala sikhulumisana labo kodwa lamhlanje siqale loluhlelo emathathakusa kulabo asebevele belala lapho abathengisela khona sebephila edolobheni okuyikwephula imithetho yedolobho.”
Amapholisa aweZimbabwe Republic Police enkundleni yabo yebulenjini iTwitter bachaze ukuba kuhlelo lwalamhlanje lwekhansili yako Bulawayo lokususa abantu abathengisa okungekho emthethweni kulimele abantu abathathu abadutshulwe ngenhlamvu zerubber kulandela ukulwisana okuqhamuke ngemva kokutshengisela kwabaphila ngokuthengisa besola uhlelo lwekhansili lokubakhipha enzikini yedolobho.
Ikhansili layo ithi izisebenzi zayo ezintathu zilimele ngesikhathi bexotshanisana labantu abathengisa okungekho emthethweni emgwaqweni kuFive Avenue.
Loba nje amapholisa ekhansili ethethe impahla zabathengisayo yaxotsha abantu enzikini yedolobho abanye babo ngokutshona kwelanga bebe sebebuyele ukuyathengisa lapho okuxotshwe khona abanye.