lkhansili yakoBulawayo imanyene lenhlanganiso ye-CORDAID ziphakathi kohlelo lokuhamba behlaba abantwana abaphansi kweminyaka emihlanu yokuzalwa, amajekiseni okuvikela imikhuhlane, abaphani kweminyaka emihlanu yokuzalwa. Uhlelo lolu lwenziwa kumahlandla amathathu, okwensuku ezinhlanu ngehlandla.
Ihlandla lakuqala lamalanga amahlanu liqale ngoMvulo lisiyaphela ngoLwesihlanu kuwo wonke amakilinika alitshumi lasificaminwe mibili-18, awekhansili lamakilinika azimeleyo okugoqela labalanda abantu ezindlini.
Isakhamuzi sakoBulawayo uNkosikazi Nokuthaba Baloyi, uthi ubengazi ukuthi kulo hlelo olunjalo.
“Umntwana bengingakamhlabisi okomnyaka owodwa; lokhe ngacina ukumhlabisa kuhlelo oludlule.”
UNkosikazi Ayoletha Siphuma uthi ingane yakhe ileminyaka emithathu, njalo kakenelisi ukumhlabisa amajekiseni awokumvikela kukhuhlane evame ukuhlasela abantwana.
“Kuhle uma uhlelo seluqalile njalo ngoba mina ngiyehluleka ukuyahlabisa umntanami ngoba ngiyasebenza. Ngiyethemba ukuba ngizakwenelisa kuhlandla leli eliqaliweyo.”
Isikhulumi sekhansili yakoBulawayo uNkosikazi Nesisa Mpofu uchaza kabanzi ngohlelo lwabo lolu.
“Kusukela ngoZibandlela kusiyafika kuMbimbitho sizaqhuba uhlelo lokuhlaba abantwana abaleminyaka emihlanu kusehla. lzakhamizi bayenelisa ukuyahlabisa abantwana kumakilinika lezibhedlela ukuze bavikeleke kumikhuhlane.
UNkosikazi Mpofu uqhubeke ekhuthaza abazali ukuthi bathathe leli thuba lwalolu hlelo ukuhlabisa abantwana ukuze kwehliswe ukuqhamuka kwemikhuhlane ehlasela abantwana.
“Uhlelo lokuvikela abantwana kumikhuhlane luqhakatheke kakhulu, njalo wonke umzali ongela siqiniseko sokuthi umntwana uhlatshiwe, kumbe waphiwa imithandazo yokuvikela, kumele aye lomntwana emtholwampilo oseduze laye ayethola usizo.”
Ukuhlatshwa kwabantwana abaleminyaka emihlanu kusiyaphansi bevikelwa emikhuhlaneni, luqondane labazalwayo kanye lalabo abaphanjaniswa yikuqhamuka kobhubhane olwe-Covid 19. Labo abasalele muva ekuphiweni imithi lamajekiseni la, bazahle bayitholiswe yonke ukuze bavikelwe ekubambeni imikhuhlane ethelelanwa lula. Ngaphambilini kobhubhane, omama babe vame ukuyahlabisa abantwana amajekiseni okubavikela emikhuhlaneni enjenge ndingindi, polio, uqhuqho lwe-whooping cough leminye, emakilinika.
Ngomnyaka odluleyo uhulumende uke wabambisana labekhansili yakoBulawayo njalo ukuqhuba uhlelo olufanayo, olokuvikela abantwana ngokubathontisela emlonyeni bebalanda ezindlini.
Inengi labantwana balakho ukuhlaselwa yimikhuhlane efana lendingindi leminye ethelelwanayo lula kodwa uma bevikelwe kubanganeno ngoba umzimba ulakho ukuba lamasotsha okulwisana lomkhuhlane.
