WASHINGTON DC - Kuqhubekela phambili ukukhahlanyezwa kwabaphikisayo eZimbabwe ngesikhathi kulungiselelwa ukhetho olukhulu oluzakwenziwa lonyaka.
Abaphikisayo bathi uhulumende kaMongameli Emmerson Mnangagwa ubathwalele ubhulo ngenxa yokuthi kabavunyelwa lokwenza imihlangano lozulu.
UMnu. Bongani Ncube, ohlala eBinga, uthi ukubotshwa kwamalunga eCitizens Coalition for Change ekhokhelwa nguMnu. Nelson Chamisa kuveza ukuba ibandla elibusayo lenza santando.
UNcube uthi uMnangagwa uyazehlulekela. Kodwa uMnu. Belive Gaule webandla leZanu PF uthi uhulumende kaMnangagwa kabophi mahlayana abaphikisayo.
UGaule uphinde wathi amabandla aphikisayo aphehla inkulumo ngesikhathi kulungiselelwa ukhetho oluqakathekileyo.
Abakubandla leCCC bathi bathwaliswe nzima ngamapholisa okukhanya engani asetshenziswa nguMnangagwa labanye bakhe. Kasenelisanga ukukhuluma ngodaba lolu lesikhulumeli samapholisa, uSenior Assistant Commissioner Paul Nyathi obengaphenduli umakhalekhukhwini.