AbeZimbabwe abahlala kweleBotswana babikwa sebezithola bebhekane lohlupho lokungatholi imithi ezibhedlela zikahulumende. Uhulumende uthi ukusilela lokhu kudalwa yikuphazamiseka ekuthengisweni kwemithi umhlaba wonke jikelele.
Umphathintambo obona ngezempilakahle kweleBotswana, uDokotela Edwin Dikoloti, uthi uhulumende wakhe uyazama ukuthi aqondise lumsebenzi ukuze ubuyele kusimo esasikhona ungakaphanjaniswa yikuqhamuka kobhubhane olweCovid 19.
Lokhu kuza ngesikhathi inengi, okugoqela abeZimbabwe lithwala nzima ukuthola imithi ezibhedlela zikahulumende kweleBotswana.
UDikoloti uthi eleBotswana selithenge imithi esendleleni isuka emazweni atshiyeneyo aphatsheya.
“Ngokunanzelela uhlupho esilalo ukuthi asilamithi, sesithintane lama hofisi ethu akwamanye amazwe ukuthi asiphathise ukuthi singathola ngaphi imithi.”
IBotswana ikhala ngokuthi ukusilela kwemithi kudalwa zindlela zokuthenga ezaphazanyiswa kakhulu yikuqhamuka kweCovid-19. Ukuswelakala kwemithi sekulimaze kakhulu inhlangothi zamaqula abafana labokuza kanye labalemikhuhlane engelaphekiyo.
UMnu. Cephas Tshuma, owenhlanganiso yeDiaspora Community eGaborone, uthi uma kusiba lokusilela kwemithi, abokuza yibo ababhekana lobunzima okudlula abanikazi belizwe.
"Ungakhangelisisa uma isimo sisoma abokuza yibo abalimalayo ngoba akula lapho abangakhangela khona. Njalo abakithi inengi abala medical aid. Imithi ikuma pharmacies kodwa ngale kuyadula.”
UTshuma uthi inengi labeZimbabwe alisebenzi imisebenzi ebabhadala imali eyokuthi bangenelisa ukudinga usizo kundawo zempilakahle ezizimele zodwa.
"Kulobunzima obukhulu kakhulu. Uyazibuza ukuthi abantu bakithi bazaphephela kuphi, uma kunzima kubanikazi kwelizwe, kwabakithi kuzabanjani.”
Okunzima kunengi labeZimbabwe abangenelisi ukufinyelela usizo kwezempilakahle ezizimele zodwa yikuthi lekhaya isimo siyafana.
UMnu. Mkhululi Moyo, oke wehlelwa yingozi ngenyanga edluleyo, uthi uphume esibhedlela engatholanga usizo oluyangaphi ngenxa yokusilela kwemithi.
“Ngikhuluma nje yinto engike ngahlangana layo. Ngike ngaba lodubo ngangena esibhedlela sikahulumende. Usizo angilutholanga. Thina abokuza kuyasilimaza kakhulu ngoba asilazo izimali ikakhulu thina esiphephela emazweni angomakhelwane.”
Uthi ezibhedlela bayenelisa ukulobela incwadi yokuthi udinge imithi kwezinye indawo zikahulumende kodwa imithi kayitholakali, okudala okokuthi umuntu acine esiya ezibhedlela ezizimele zodwa.
“Uzazibhoda zonke izibhedlela kodwa awusoke uthole lutho. Ekucineni kuzamele uyeku private, kodwa ngale bafuna imali enengi. Ngakho yisimo esinzima kakhulu.”
Umnunzana Ntokozo Thebe osebenza eGaborone laye ukhala isililo esifanayo ngokuswelakala kwemithi.
“Asisihle isimo abantu abazithola bekuso. Kubuye kubenzima kakhulu kithi thina abantu bangaphandle, inengi lethu lengalazo indlela elingathola ngalo usizo ngaphandle kwezibhedlela zikahulumende.”
Kulokukhathazeka ukuthi abaphila lemikhuhlane engelaphekiyo efana letshukela kanye legciwane lengculaza, bangazithola sebekusimo esingasihle ngoba kumele bethole imithi ngesikhathi.
Kodwa umphathintambo Dikoloti uthi akukabi lembiko yabantu asebebhubhe ngenxa yokuswelakala kwemithi ezibhedlela.
Uthi abangeke bacabangela ukuthi umuntu ubulewe yikuswelakala kwemithi, kodwa kumele kube lobufakazi obuvela kudokotela buqinisa isizatho semfa.
