Abantu eZimbabwe bavumelana ukuba kumele kulungiswe ukusilela kwamandla kagesi ukuze kulungiswe umnotho ongathuthuki ngemfanelo elizweni.
Kulabanye abathi kumele kulungiswe ezombangwazwe ngomnyaka ozayo ngoba kungeke kube lenguquko uzulu exokozela eZimbabwe.
UMnu. Believe Gaule, okubandla leZanu PF, ngomunye wabathi kumele kulungiswe ukusilela komlilo kagesi ukuze eleZimbabwe lithuthuke ngomnyaka ozayo.
UGaule uthi kumele njalo ikhomishini yeZimbabwe Anti-Corruption Commission ihlolisiswe njalo ilolwe ukuze kubotshwe abantu abenza ubukhohlakali obubhidliza ilizwe.
Omunye wakhe, uMnu. Mlungisi Moyo, okubandla elibusayo, uthi okwamanje kukhanye engani uhulumende uselungisa uhlupho lokusilela kwamandla kagesi.
UMoyo uthi kunengi okuhle okwenziwa nguhulumende kaMnangagwa.
Kodwa uMfundisi Useni Sibanda, umqondisi weZimbabwe Christian Alliance, uthi ukusilela kwamandla kagesi kuzaqhubekela phambili ngomnyaka ozayo.
Uthi babengi abadabuka eZimbabwe abazasuka elizweni ngenxa yokuswelakala kwemisebenzi.
Kulabanye njalo abacabanga ukuba kuzakuba lenguquko eZimbabwe oluzalethwa yimpumela yokhetho oluzayo. Omunye wabo nguMnu. Fortune Mlalazi, ingcwethi kwezombusazwe ezimeleyo.
EleZImbabwe lizaqhuba ukhetho lokudinga amakhansila, amalunga edale lephalamende lomongameli ngomnyaka ozayo.
Ukhetho lolu luzaqhutshwa ngesikhathi ilizwe libhekane lenhlupho ezinengi ezigoqela ukusilela kwamandla kagesi, ukuswelakala kwemisebenzi lokunye.