Kulenkulungwane lenkulungwane zabe Zimbabwe abahlala kwele Botswana abalubhekise ekhaya ngekhefu leKhisimusi ngesikhathi kuyekethiswe iziqondiso ezinengi zokulwisana lomkhuhlane weCOVID-19.
Ukuchapha imngcele eminyakeni embili edluleyo bekulukhuni ngenxa yemigoqo eyafakwa ngamazwe atshiyeneyo agoqela eleBotswana kanye leleZimbabwe, kuyindlela yokulwiswana leCOVID-19.
Kodwa lonyaka, kulandela ukuyekethiswa kwezinqondiso zeCOVID-19, inkulungwane ezeZimbabwe ezisebenza kweleBotswana zihambile ekhaya ukuyakuba lezihlobo labangane ngesikhathi sekhefu leKhisimisi.
Lokhu kulethe injabulo kunengi elikubhizimusi yezimota ezithwala uzulu, kugoqela uMnu. Busani Moyo, osebenzela eyinye ibhasi ehamba phakathi kweGaborone leHarare.
“Hayi kuyaphithizela lokhe kuqale mhlaka 22 Mpalakazi. Lemngceleni bathi kunzima kakhulu. Kuze kwabangcono mhlaka 24. Abantu bahambile okumangalisa. Ogogo labokhulu bazakudla sibili iKhisimusi ekhaya.”
Omunye wakhe Umnu. Welcome Matara osebenzela erenkini yeGaborone, uthi bekuphithizela lonyaka uma kuqhathaniswa leminyaka embili edluleyo.
“Sibone abantu abanengi kakhulu. Abadlula inkulungwane ngelanga kade bephuma lapha. Lodaba lweCOVID lunganeno njalo akudingakali okunengi ngalesikhathi.”
Nomanje kulabantu abanengi abalubhekise ekhaya ngekhefu leKhisimusi lomnyaka omutsha, kulabanye abafana loMnu. Godfrey Moyo bona abaphathise ezimnandi kodwa bedlalela ikhisimusi kwele Botswana.
“Mina ukuthi ngingayi ekhaya yikuthi ngibanjwe ngumsebenzi, yikho ngibone kufanele ukuthi ngithumele imphahla ekhaya.”
Abanye njalo abeZimbabwe baphumile elizweni ukuyahlaba ikhefu emazweni afana leBotswana leSouth Africa besithi kungcono ukuba ngaphandle kwelizwe ngesikhathi umnotho ungamanga kahle ekhaya. Kodwa izihambi zikhala ngentengo yokuhamba eqonge okwamagama ngesikhathi sekhefu leKhisimisu.
UMnu. Matara yena uthi yiso sodwa isikhathi abakubhizimusi lezimota ezithwala uzulu abathola ngaso inzuzo.
“Lathi sikubhizimusi, kulesikhathi sokuthi intengo iqanse kwesinye isikhathi iyehle. Kulendleko ezinengi ezifana lamafutha emota, ngakho uma abantu bebanengi kemele lathi sithole khonapho.
Izihambi njalo zidaniswe yikuchitha isikhathi eside emngceleni weRamokgwebana lePlumtree ngenxa yendwendwe zabantu, ikakhulu abakade bengena elizweni.
EleBotswana leleZimbabwe zivame ukuthi imngcele ingavalwa ngesikhathi sekhefu leKhisimusi, kuyindlela yokunciphisa isikhathi izihambi ezisichitha emngceleni.
Kodwa lonyaka akuzange kubikwe ukuthi kungani imngcele ibivulwa amahola ajayelekileyo kusukela ngehola lesithupha ekuseni kuvalwa ngeletshumi ntambana.