Izakhamizi zemaphandleni esabelweni seZansi yemaNdebeleni zithi ukubhidlika komnotho welizwe okuvezwa yikuqonga kwentengo yempahla ezitolo kuzadala ukuthi iKhisimusi yalonyaka ibeduma.
Inengi kulesisabelo livele libhekane lendlala enkulu ngenxa yokungani kuhle kwezulu kuliminyaka lithi lelilanga lizadlula nje njengamanye.
Izakhamizi ezixoxe lomsakazo we-Studio 7 zithi zizalondoloza imadlana ezilayo ukuze zibhadalele abantwana indleko yesikolo lapho zivulwa ngomnyaka ozayo.
Ukuma manzonzo komnotho lokuqonga kwentengo yempahla ezitolo sekutshiye inengi labazali kumele likhethe phakathi kweKhisimusi lekusasa yabantwababo.
UNkosikazi Matilda Dube oyisakhamuzi se-Insiza uthi kulezinsuku ikhisimusi sokulibizo nje.
“IKhisimusi ngensuku ezadlulayo yayilungiselelwa sibili kuthwe sizakudla izinkwa, sidle inyama, sitshebe izinkwa etiyeni sikholise siyegida kubomakhelwane ama-radio siyenze konke okumnandi okuthokozisa umntwana lezigqoko lithengelwe; kwakumnandi manje alimnandi ilanga leKhisimusi ngoba uyabe ungelayo imali yokuthi uthenge ukudla okweneleyo.”
UMnu. Gabriel Moyo oyisakhamuzi seMawane eGwanda uthi lanxa ezahlaba imbuzi ngeKhisimusi kasoze asebenzisa imali enengi ngoba izikolo lazo sekuseduze ukuthi zivulwe.
“Into zakhona zonke akulanto ehambayo lomnotho ufile, kusalele nje abantwana abalokhu besayikhwabitha izinto ziyabiza , zibiza zinjalo imali yakhona asiyitholi eyokuthi ungenzela abantana ikhisimusi izikolo zivulwa imali iyabe ifuneka. Imbuzi abantwana sizabahlabela badle kulokuthi bayekudla emzini, vele akusafanani lakudala, kudala ilizwe lalihlezi into zonke zazivele ziqondile.”
UNkosikazi Siphathisiwe Nkala oweSilikwe eGwanda North uthi bazancedwa zimpahla abakade beziqogelele bengabomama umnyaka wonke.
“IKhisimusi sifikile kusuke kwabanzima lonyaka kayisoze ifane lemnyaka eminengi ngenxa yodubo lwemali, kodwa kunzima kunjalo omama bayazama ukwenza ama-Club, batshayile ama-Club abo ama-grocery ayiyo asethenjiwe ngemakhaya ngekhisimui okunengi akusekho vele ikhisimusi yakathesi ayisafani leyakudala ngenxa yesimo somnotho, abemazweni sebefikile kodwa ababuyanga okweminyaka yonke ukuthi bayake bebuye ngobunengi.”
UMnu. Collen Ngwenya oyisakhamuzi seMarinoha kuWard 10 eMatobo South, uthi inengi lezakhamizi lizabe ligola amacimbi ngosuku lwekhisimusi.
Unkosikazi Saziso Khumalo yena odabuka eVokola eInsiza njalo elikholwa uthi iKhisimusi yalonyaka ibusisekile ngoba abantu bezabonana ngemva kwesikhathi eside bevalelwe emazweni atshiyeneyo kulandela ukuqhamuka kobhubhane lweCovid 19.
“Lonyaka futhi iKhisimusi ingelanga langeSonto abantu abakhonzayo lilanga elihle kakhulu elokumbonga umlimu ngoba abanengi sizakuhamba ezinkonzweni siyemkhonza umlimu, so hayi ngalezondlela iKhisimusi yalonyaka izakuba ngebusisekileyo, futhi mnandi kodwa ayisoze ifanane lakudala, izinto asisazitholi njengakudala ukuthi kwakuhle kulungiselelwe ilanga leKhisimusi kuseselesikhathi.”
Amapholisa esabelweni seZansi yemaNdebeleni asekhuthaze uzulu ukuthi ajabule kodwa engadlulisi amalawulo. Eminyakeni edlulileyo abantu bacina belimazana kumbe bebulalana ngelanga leKhisimusi.