Intengo yamandla e-Gas ekhitshwe lugatsha oluqondisa ukuthengwa kwamafutha ezimota olwe-ZERA lokhe inganeno nxa kuqathaniswa lentengo yayo ngesikhathi esifanayo ngomnyaka odluleyo.
Uzulu wamukele ngenjabulo lintengo laloba ekhonona ethi ilokhu iphezulu. IZERA ithi. i-gas izathengiswa phose ngamadola amabili eMelika USD1.83 kumbe phose ngenkulungwane lengxenye yemali yakuleli ZW$1,208.58 ku-kilogram eyodwa.
UMnu. Effort Ncube, umqondisi wenhlanganiso ebona ngamalungelo abathengi, eye-National Consumer Rights Association, uthi lintengo lokhu isinda inengi lezizalwane ze-Zimbabwe ezihola nge-bond.
"Sizakhumbula ukuthi abantu abanengi e-Zimbabwe bahola imali ngama-Bond, bayizuza ngama-Bond. Ngakho ke, ukuguqula imali yeZimbabwe iye emalini yakwese-Melika sekudinga imali enengi kakhulu abantu abangayizuziyo. Ngakho kuzakutsho ukuthi uma bezathenga lezizinto okufanele ukuthi bazithenge bamele babe lemali enengi kakhulu kulaleyo akade beyisebenzisa nyakenye, okuyinto ebabangela ubuhlungu lobunzima obukhulu ngokuba bengayizuzi leyomali."
Omunye wabathengisa igasi emkambo uMnu. Lethubuhle Maphosa uthi, ukusilela kwamandla kagetsi sokubancede ukuthuthukisa ibhizimusi yabo.
“Kulezi insuku, kungcono ngenxa yokuthi amagetsi ayabe ehamba kodwa abantu bayabe belokhe be-filler i-gas encane kuyabe sokungani umsebenzi wakhona mnengi. Kulezi insuku ubungcono bakhona yikuthi asilali umuntu engatholanga mali ngenxa yokuthi abantu bayabe bebuyile; ngaphandle kokuthi nxa ungelayo yikho okuba le-problem kodwa akufani."
UNkosikazi Sanele Mguni, isakhamuzi sako-Bulawayo uthi bakhangele ukuthi nxa intengo iyehlile ingasisileli njengakweminye iminyaka.
“Singakhangela isimo esikiso esokuhamba kwamagetsi khathesi bekufanele ukuthi kubekhona okwenzakalayo ngentengo yegas ngoba inengi selidanela kiyo. Siyananzelela futhi ukuthi kweminye iminyaka iyabe idula futhi ihlupha ukutholakala,siyathaba nxa intengo yehlisiwe sikhangelele ukuthi ingasileli njengakweminye iminyaka."
Unkosikazi Zanele Phiri ingcwethi kwezomnotho uthi intengo ye-gas ilawulwa yikudingakala kanye lokuzuzakala kwayo, njalo lonyaka intengo ibingakhuphuki ngesibanga esikhulu, ngoba ilizwe leSouth Africa eliyilo elithengisela i-Zimbabwe kalivalanga okuphekwa kwe-gas okwesikhathi eside.
"I-price ye-gas this year ibi-stable, ngenxa yokuthi ama-South African plants awe-gas avale okwesikhathi esifitshane. I-price yakhwela kakhulu ngo-April ngenxa ye-short supply. I-gas siyiwoda outside so i-price iya ngokudingakala kwayo lokuzuzakala kwayo i-gas; i-ZERA yona ibuya i-regulator ama-prices kuphela. Intengo yayo ayihlelwa yi-economic environment yethu."
Inengi likazulu emadolobheni lisebenzisa amandla kagetsi, njalo yiwo angathi alentengo enganeno. Kodwa, kusukela lapho kuqala ukucitsha kwamagetsi, uzulu sedanela ekuthengeni i-gas, ngoba inkuni lazo zingatholakali.
Kuviki edluleyo, inkampani ye-ZETDC ikhuphe umbiko isithi uzulu uyikweleda imali engaba yizigidi ezilitshumi lane zamadola eMelika.
