Umkhokheli wenhlanganiso ye-Tranparency International Zimbabwe, uMnu. Tafadzwa Chikumbu, usedolobheni leWashington DC elanda umhlangano lapho okudingwa khona amaqhinga wokulwisana lenkohlakalo esibhahile kwelezimbabwe.
UChikumbu, utshele i- Studio 7 ukuthi lumhlangano waqoqwa nguhulumende wele-Melika ebambane lenhlanganiso ye-Transparency International. Ubuye wathi kulamalunga aphuma emazweni alikhulu lamatshumi amabili lane anxusiweyo ukuzophatheka kulomhlangano.
Lawo malunga agoqela inhlanganiso ezizimeleyo, kanye lenhlanganiso zikahulumende amazwe atshiyeneyo. Inhlanganiso ye-Zimbabwe Anti-Corruption Commission eyabunjwa nguhulumende ngenjongo yokulwisa inkohlakalo, layo iphatheka kulumhlangano osungulwe izolo, ugqitshwa ngolweSihlanu.
UChikumbu uthe kunengi okumele kulungiswe elizweni le-Zimbabwe ukubona ukuthi inkohlakalo kayiqhubeki imemetheka, njalo lapho uzulu abona kulenkohlakalo khona engatsheni zikahulumende, angesabi uyamangala. Uphethe ngokuthi okwamanje akukabi lemithetho eqinileyo evikela labo ababika inkohlakalo.