Izakhamizi zeMaramani KuWard 8 eShashe eBeitbridge zibhekane lodubo lwendlovu njalo zifuna iziphathamandla zithathe amanyathelo lezi ndlovu zingakabulali abantu.
Izakhamizi ezixoxe lomsakazo weStudio 7 zithi sezihlala zivule amehlo ngoba zisesaba ukuhlaselwa yilezindlovu esezihluphile emangweni weMalibeng.
UNkosikazi Lerato Muleya oyisakhamuzi seMalibeng uthi abasabuquthi ubuthongo ngenxa yendlovu lezi.
“Lapha silele sithithibele, ziphenduke nje eduze khonapha izihlala ziwile.Bakithi mina bengicela yisicelo sami sicela sibili lisizamele ngendlela zonke ukuthi kumbe lisikhulumele labeParks angazi ukuthi kuhanjiswa ngandlela bani ngiyacela sibili ngoba osekulapha akusemnandi, kathesi ngikhuluma bezihlaba umkhosi duze khonapha emasimini thina siyabe sizitshela ukuthi zisegangeni kanti sezingene phakathi lalapho okuhamba abantwana besikolo liyabona ukuthi sokuyingozi enkulu.”
Lamazwi asekelwe ngesinye njalo isakhamuzi uNkosazana Emelia Ndlovu othi bahlalele evalweni.
“Khonapha silalele yingozi imizi yonke leyi kuwa isihlahla njengesihlahla lamuhla zikelemile.”
Uzulu uthi sesesabela impilo yakhe leyabantwabakhe abalakho ukuhlaselwa yilezindlovu besendleleni yesikolo, nangu uNkosikazi Ndivhuwo Ncube.
“Zingakelema zibulale abantu sihlale njani thina lenyamazana ezimbi kangaka so bathi thina senza njani lokhu kunzima, kathesi abantwana bavela ezikolo bahlangane lazo abazazi bazabukela sibili zicine zibulele liyabaona ukuthi kubuhlungu kangakanani, kubuhlungu sibili.”