Kuyaxokozela kubandla leMovement for Democratic Change (MDC-T) ekhokhelwa nguMnu. Douglas Mwonzora eselimangelelwe emthethwandaba nguMnu. Norest Marara, othi utshiywe phandle kokhetho lokudinga umongameli omutsha webandla leli.
UMarara uthi bekufanele abazancintisa bekhethwe nguzulu hatshi idale leNational Council.
Kodwa uMnu. Llyod Damba, isikhulumeli sikamongameli webandla leMDC-T, uthi uMarara ukhuluma angakwaziyo.
UMnu. Ambrose Sibindi, okunhlanganiso yeBulawayo Progressive Residents’ Association, uthi kwephula inhliziyo okwenziwa libandla leli lamanye eZimbabwe avimba abanye abantu ukuba bengancintisi kukhetho lwamabandla.
Uthi kuyayangisa lokhu ngoba amabandla aphikisayo akhangelelwe ukuba abeyiwo alwele ilungelo lokuvota.