Abacubungula ezomnotho welizwe bathi ukwehla kwesilinganiso sokugugudeka komnotho, ese-inflation ngenyanga kuyinto enhle engabe iveza imizamo yokulungisa umnotho eyafakwa ngumphathintambo wezemali umnumzana Mthuli Ncube.
Ukukhuphuka kwesilinganiso sokugugudeka komnotho ngenyanga sokwehlile kusiya kokuphose okubili ekhulwini-1.8% ngenyanga kaLwezi kusuka kokuphezu kokuthathu ekhulwini-3.2%.
Lokhu kwamukelwe ngosomabhizimusi abathi bakhangelele ukuthi isilinganiso sokugugudeka komnotho ngomnyaka lawo sehle. Okwamanje sikumakhulu amabili lengxenye (255%) sisuka kumakhulu aphezu kwamabili lasithupha (268.8%).
Umongameli wenhlanganiso ye-Confederation of Zimbabwe lndustries (CZI) uMnu. Kurai Matsheza uthi lokhu bayakwamukela ngenjabulo.
“Intengo esizibonayo zisehla siyazamukela eZimbabwe kuyinto enhle.Sithemba ukuthi kuzahlala kuzekufike iminyaka ezayo ukuthi sicine sikhuluma ngama ami aphansi ngomnyaka ngomnyaka.”
Ohlaziya ngezomnotho uMnu. Thabo Ndlovu uthi lokhu kungabe kubangelwa yimizamo efakwa nguhulumende kodwa akuthembisi ukuthi kuzakuba ngokwesikhathi eside.
“I-annual inflation lapha i-slower down kutsho ukuthi ama-prizes lokhe ekhwela, but awasagijimi ngendlela ayegijima ngayo okuyinto enhle kodwa into eqakathekileyo yikuthi sibe le-confidence on the business. Okwakhathesi asingeke sathi kuleplan for a long term kwenzakale khathesi kwabaledrop kodwa asikwazi ukuthi will it be sustained for a long future.”
Laloba kunjalo kulabanye osomabhizimusi abathi akulanto esiguqukile kwezomnotho welizwe ngoba yonke into ilokhe inzima intengo yemphahla lokudla kukhuphuka mihla ngemihla.
UNkosikazi Nobuhle Ntuliki usomabhizimusi osakhulayo uthi bakhangelele ukuthi ukukhuphuka kwentengo kwehle ukuze umnotho welizwe lawo ubuyele endaweni.
“Nxa sikhangele ama figures awe inflation awasichazi ngoba ayisikho esikukhangeleleyo njengama business akhulayo sikhangelele ukuthi ehle futhi ngoba akulanto ephumayo.Akumnandi ukuthi sihlale sikhweze intengo sikhathi sonke. Inflation ayehle maybe I economy ingatshintsha.
UMnu. Effort Ncube isikhulumeli se-National Consumer Rights Association uthi konke lokhu okwenzakalayo akulethanga inguquko.
“Lanxa kukhulunywa ngokuthi kubelezinguquko ku inflation yehla kancane akukathinti amaholo abantu lempilo abayiphilayo insuku ngensuku esingathi sekulethe inguqhuko. Abantu baqhubeka behlupheka bengenelisi ukuthenga abakufunayo ukwehla okuncane kangaka akulethanga nguqhuko.
Amanani ethulwe yinhlanganiso yeZimbabwe National Statistics Agency aveze njalo ukuthi isikhwama esidingwa ngumuntu oyedwa ngenyanga kaLwezi singamadola azinkulungwane ezilitshumi lantathu ZWL13.349.42 kuthi ngomfumfu besiku-ZWL 13.113.95.
