Umantshi Feresu Chakanyuka namuhla wethule isinqumo sokwalela uMnu. Job Sikhala, ummeli weZengeza West edale lephalamende ukuhlawula isibambiso se-bail.
UChakanyuka uthe kaboni mehluko kubufakazi besicelo sika Sikhala esitsha, njalo umbona njengomuntu ongabuya ephule njalo umthetho engakhululwa.
Icala aletheswayo elokuphehla udlame ngemva kokubulawa kukankosazaa Moreblessing Ali, ilunga lebandla lakhe ele-CCC, likhangelelwe ukuqala ukuthethwa mhlaka 5 kaMpalakazi.
Ibandla leCCC lithi uSikhala ufela ukuthi ngumuntu webandla eliphikisayo. Soku ngokwetshumi usikhala ecela ukukhululwa ngesibambiso se-bail.
Omunye etheswa laye lelicala, uMnu. Godfrey Sithole yena sewakhululwa nge-bail. Sizweni uGift Ostallos Siziba umsekeli wesikhulumeli se-CCC ngaloludaba.
Kwelinye njalo icala ebeli phambi kukamantshi uFeresu Chakanyuka, uNkosazana Marry Mubaiwa, owayengumkahe kamsekeli kaMongameli uMnu. Constantino Chiwenga, umantshi uthe uzakupha isinqumo sakhe ngolweSine sesicelo sika Nkosazana Mubaiwa, esokuthi icala lakhe liyethoniswa kwele-South Africa, lapho okuthiwa kulapho azama khona ukubulala uMnu. Chiwenga.
UNkosazana Mubaiwa yena uthi kasoli lutho ngendlela icala lakhe elihamba ngayo, kodwa udaniswa yikuthi inhlanganiso zabomama kazimanga laye ngesikhathi sakhe sobunzima. Sixoxe loNkosikazi Patricia Tshabalala omela amalungelo abomama ngaloludaba.
