WASHINGTON - UMnu. Saviour Kasukuwere, owabaleka eZimbabwe ngesikhathi owayengumongameli uRobert Mugabe esuswa libutho esikhundleni, ukhangelelwe ukuba uzancintisa kukhetho lukamongameli oluzakwenziwa ngomnyaka ozayo.
UMnu. Ntokozo Msipha, okunhlanganiso yeTyson Wabantu ekhankasela uKasukuwere, uthi kunengi abakwenzayo khonamanje ukwenzela ukuba uKasukuwere ancintise kukhetho oluzayo.
UMsipha katshongo ukuba uKasukuwere uzancintisa ekuliphi ibandla njengoba elibusayo selakhetha uMongameli Emmerson Mnangagwa ukuthi ancintise kukhetho luka mongameli.
Uthi kunengi abazakwenza kulungiselelwa ukhetho lolu, okugoqela ukuphendlela indlela uKasukuwere ukuze akhokhele eleZimbabwe.
UKasukuwere waphosa wabulawa libutho eZimbabwe kusabusa uMugabe, owagenqulwa libutho ngomnyaka ka2017.
Wayekucele lebandla leZanu PF elibizwa ngokuthi yi-Generation 40, elalilamalunga agoqela uSikhwicamfundo Jonathan Moyo, uMnu. Patrick Zhuwao, uNkosikazi Grace Mugabe labanye.
UKasukuwere, owethule umbiko ojulileyo enkundleni zokuxhumana ngobudlelwano bakhe lebandla elibusayo, uthi kukhanya engani kuyehlula ukuxoxa labamele uMnangagwa.
UMnu. Tafadzwa Mugwadi, obona ngokwethulwa kwemibiko kubandla leZanu PF, uthi uKasukuwere uzichithela isikhathi ekhuluma izinto ezingelangqondo.
UMugwadi uthi uKasukuwere uyakwazi okumele akwenze uma efisa ukubuyele kubandla leZanu PF hatshi ukutshona ekhonya njengequde elingaqedakaliyo.
Lokhu kusekelwa nguMnu. Munashe Mtutsa, ilunga lebandla leli, othi uKasukuwere uhamba etshela abantu ukuthi waphosa wabulawa ngamasotsha.
UMtutsa thi akulabufakazi obuveza lokhu.
UKasukuwere uthi angeke axolisa akwenza engakabaleki eZimbabwe, ikakhulu ekucele leG40.