Iqula leCommonwealth elikwele Zimbabwe lithi abantu abenengi elikhulumisane labo bavumelene ukuba ilizwe lele kumele libuyele kumanyano lo ngoba selenelise ukugcwalisa okunye okwakumele likwenze ukuze lamukele yinhlanganiso le.
UMnu. Luis Franceschi, okhokhela iqula leli, utshele intathelizindaba eHarare namuhla, ukuba bakhulume loMongameli Mnangagwa, abamabandla aphikisayo, abezokholo labenhlanganiso ezizimeleyo ngokubuyela kwele Zimbabwe kumanyano lo.
Uthi kulesinqumo senhlanganiso ye-Commonwealth esomnyaka ka2013 esaphawulwa eKampala, esasilawula lokho okumele kwenziwe ngele Zimbabwe ukuze lingene kulumanyano esithi isisekelo sombuso weZimbabwe silawula okunengi okuhambelana lesinqumo lesi.
Uqhubeke esithi okunengi abakuthole kuhambo lwabo namuhla kukusibanga sakuqala salokho abafuna ukukwenza ukuze eleZimbabwe libuyele kuCommonwealth.
Uthi kule zigaba ezine okumele zilandelwe ukuze ele Zimbabwe lingene kulumanyano. Umphathintambo kahulumende obona ngezemithetho, uMnu. Ziyambi Ziyambi, uthi kuqakathekile ukuba eleZimbabwe libuyele kunhlanganiso le.
UMnu Nelson Chamisa, ukhokheli webandla leCCC, uthi utshele iqula leCommonwealth ukuba kumele kukhitshwe emajele ababotshiweyo abafana labe Mthwakazi Republic Party lommeli weZengeza West, uJob Sikhala. Uthi uvumelana lokuba eleZimbabwe libuyele kuCommonwealth.
Lokhu kusekelwe nguNkosikazi Ellen Shiriyedenga, laye okubandla leCCC.
EleZimbabwe lasuswa kunhlanganiso yeCommonwealth ngowayengumongameli, umuyi uRobert Mugabe, okwakuthiwa wephula olungelo loluntu njalo uhulumende wakhe uqhuba ukhetho olungaqedakaliyo.