Lusegudwini udaba lwendlovu emhlanganweni oweConvention on International Trade in Endangered Species (CITES) osungule edolobheni lePanama City ngoMvulo.
Iziphathamandla zeZimbabwe lazo zisePanama, lapho ezizama ukuncenga ukuthi ilizwe livunyelwe ukuthengisa impondo zendlovu ezigciniweyo.
Amazwe angezansi kwezwekazi leAfrica, agoqela eleZimbabwe kanye leleBotswana athi awaphathwa kahle ngendlela inhlanganiso ye-CITES efuna ukulawula ukuphathwa kwendlovu emazweni abo.
Amalunga enhlanganiso yeCITES lokhe esala ukuthi amazwe afana leZimbabwe, Botswana, Namibia kanye leSouth Africa, athengise inqwaba zempondo zendlovu. Umhlangano oqhutshelwa ePanama, ukhangelelwe ukuthi uhlaziye loludaba, iZimbabwe kanye leBotswana ziyizo ezihamba phambili ukuthi kuvunyelwe ukuthengiswa kanye kwempondo zendlovu, ezatholakala kundlovu ezazifelayo kukanti ezinye zathathelwa abazingela okungekho emthethweni.
UMnu. Kabelo Senyatso, okunhlanganiso yeziphathamandla ezibona ngokulondolozwa kwezendle ngezansi kwezwekazi leAfrica, uthi bazabonisa umhlangano lo ukuthi amazwe aweSADC kumele ayekelwe elawule ukuphathwa kwendlovu.
“Siyacela amazwe akunhlanganiso yeCITES ukuthi atshengise ukuthi thina njengamazwe aweSADC esiyithi esilendlovu ezinengi, kumele sibe lelizwi eliqatha ukuthi inyamazana lezi ziphathwa njani.”
EleZimbabwe kanye leBotswana yiwo amazwe amabili alenani eliphezulu lendlovu kuzwekazi leAfrica. NgoNhlangula, eleZimbabwe lethusela ukuthi lizaphuma kunhlanganiso yeCITES ngoba ingalaleli izikhalazo zamazwe athwaliswe nzima yikugcina indlovu ezinengi.
Obona ngokulondolozwa kwendlovu emazweni afana leBotswana, Namibia, South Africa kanye leZimbabwe, uMnu. Neil Fitt, uthi kaboni ezinye izikhalazo zamazwe angezansi kweAfrica ziphumelela ePanama.Kodwa uthi kulesidingo sokuthi kubelontshintsho indlela iCITES eqhuba ngayo ibhizimusi yayo.
“ICITES kumele intshintshe indlela eqhuba ngayo, sekukunengi osekwantshintshayo lokhe le inhlanganiso yabunjwayo. Kodwa kuzabanzima ukuthi amazwe awe southern Africa aphiwe konke akukhalelayo.”
UMnu. Oscar Nkala, laye obona ngokulondolozwa kwenyamazana emhlubulweni ongezansi kwezwekazi leAfrica, uthi udaba lwendlovu kumele luphathwe ngobunono obukhulu emhlanganweni wePanama.
“Izinqumo akumelanga zithathwe kukhangelwe umoya wepolotiki ngoba kungaphambaniseka okunengi. Abanengi bathi indlovu sezinengi kodwa asikwazi ukuthi zinengi okokuthi zingathengiswa.”
UNkala uyesabela ukuthi ukuthengiswa kwempondo zendlovu kungabona inani lenyamazana ezizingelwa okungekho emthethweni liqala njalo ukuqonga.
“Yebo zikhona impondo, kodwa asikhumbuleni ukuthi kuze kwenzakalani kuze kuthengiswe inqwaba yakuqala ngo 2007. Kwavuka okunye sekubulawa indlovu, kubulawa obhejane, kuze kufike lalamuhla lokhe sithwele nzima ngenxa yokuthi kwavunyelwa ukuthi kuthengiswe impondo.”
IZimbabwe lamazwe angomakhelwane, ake avunyelwa ukuthengisa impondo zendlovu ngomnyaka ka2007. IZimbabwe, Botswana, Zambia kanye leNamibia, ziphakathi kohlelo lokubala inani lendlovu, zona ezibikwa zidlula inkulungwane ezingamakhulu amabili (220,000) emazweni womane la.
Amanye amazwe aweAfrica athi iBurkina Faso, Senegal, Equatorial Guinea kanye leMali afike emhlanganweni weCITES ukuyaphikisa okufakwe etafuleni ngamazwe angezansi kwezwekazi leAfrica, esithi kakumiswe ukuzingelwa kwendlovu.