GABORONE - Izizalwane zeZimbabwe ezihlala kweleBotswana ngaphandle komthetho zilakho ukwehluleka ukuya ekhaya ngekhefu lekhisimusi kulandela ukusungulwa komkhankaso wokulwisana lokudalwa kwamacala kulelolizwe.
Phansi komkhankaso lo, osungulwe mhlaka 1 Lwezi, amapholisa azagcwala emigwaqweni emisa izimota mahlayana kuze kuyefika isikhathi sekhisimusi, lapho abantu abanengi abayabe sebephindela khona emakhaya ukuyabona izihlobo labangane.
Usikhomishi wamapholisa kweleBotswana, uMnu Phemelo Ramarokwane, uthi umkankaso lo uqakathekile kakhulu kumizamo yokulwisana lezephulamthetho.
“Sonke kumele sibambane ukulwisana lokudalwa kwamacala ikakhulu endaweni yeBobirwa okulamasela ezifuyo okucatshangelwa ukuthi angena evela emazweni angomakhelwane,” kutsho uRamarokwane.
Isizalwane seZimbabwe esihlala kweleBotswana uMnu Mkhululi Moyo, uthi umkhankaso lo wenza kubenzima kakhulu kulabo abangelamaphepha ukuthi bahambahambe emphakathini.
“Kusuka kube buvilibana ikakhulu kwabakithi abangalamaphepha ngoba sesibabona amapholisa, khona kuyisikhathi sekumele sisebenze njengoba sekusiba yisikhathi sekhisimusi,” kutso uMoyo.
AbeZimbabwe abanengi kweleBotswana baphila ngemisebenzi yezandla, ama-piece jobs, okutsho ukuthi kumele babe behambahamba bengena ezindlini.
Omunye oweZimbabwe ohlala eGaborone, uMnu Dumezweni Ncube uthe: “Abantu bakithi bahamba nzima ekhaya, abanye kumele bebhadale indlela yonke ukuze bayefika ekhaya besiya kukhefu lekhisimusi.”
Abanye ababhekane lodubo lokuya eZimbabwe ngesikhathi sekhefu leKhisimusi ngabahlala kweleSouth Africa.
UMnu. Ngqabutho Mabhena, okhokhela inhlanganiso yeZimbabwe Community in South Africa, uthi imikhankaso efana lalo oqhutshwa ngamapholisa eBotswana ayiqondanga.
Wengeze wathi: “Siyakwazi ukuthi ukungena elizweni ngokungekho emthethweni yikwephula umthetho, kodwa kumele kuqathaniswe lokubaxotshayo elizweni elifana leZimbabwe. Kodwa sibona kungaqondanga ukubopha izisebenzi betshiye abaqatshi.”
Inengi seliqala ukulungiselela ukuphindela ekhaya ukuyahlangana lezihlobo labangane ngesikhathi sekhefu leKhisimusi, kodwa abangalamaphepha aqondileyo babhekane lobunzima obukhulu ngenxa yomkhankaso lo.
