WASHINGTON DC - Ukhetho olusanda kwenziwa kweleMelika soluphehle umbuzo omkhulu ophathelane lokuqhutshwa kokhetho lwaseZimbabwe.
Umbuzo lo ngothi njengoba iZimbabwe layo isiya kukhetho ngomnyaka ozayo, kukhona yini engakufunda kundlela iMelika eqhuba ngayo ukhetho lwayo ukuze kungabi lokudonselana okuhlala kusiba khona phezu kwempumela.
Udaba oluhlupha kakhulu kukhetho lweZimbabwe ludlakela oluqondiswe kulabo abasekela amabandla aphikisayo, ukuthenga amavoti ngemali kahulumende lokunye okutshiyeneyo okugoqela ukungavunyelwa kwezizalwane zeZimbabwe ezihlala kwamanye amazwe ukuthi zivote zikulawo mazwe, i-diaspora vote.
EMelika ukhetho luqhutshwa ngokuthula kanti lezizalwane zalelolizwe eziphandle kwelizwe ziyavunyelwa ukuvota zilapho ezikhona. EZimbabwe ibandla elibusayo eleZanu PF liyala ukukuvumela lokhu.
Lanxa eMelika kulokufuthelana okukhulu phakathi kwebandla elibusayo elamaDemocrats leliphikisayo elemaRepublicans ngendaba zombusazwe, ukhetho luphathwa ngendlela esuthisa abanengi.
Kodwa bakhona abalutshwana abakhononayo abafana lobenguMongameli onqotshwe kukhetho luka2020, uMnu Donald Trump, yena othi uMongameli Joe Biden lebandla lakhe lamaDemocrats baqilibezela. Kodwa lokho akulabufakazi.
Ukuhlaziya loludaba sixoxe lelunga leZanu PF uMnu Believe Gaule endawonye lelunga leCCC njalo engukhansila wakoBulawayo uMnu Edwin Ndlovu onguye osungula lingxoxo.
