WASHINGTON DC – Inhlanganiso yeElection Resource Center (ERC) ithi isisiya enkantolo ukuyabophisa ikomishini ebona ngokuqhutshwa kokhetho, iZimbabwe Electoral Commission (ZEC), phezu kwemali enengi okwedlulise amalawulo emele ihlawulwe yilabo abafuna ugwalo lwe-voters’ roll oludindwe emaphepheni.
Linhlanganiso ithi ibhalele iZEC incwadi kunsukwana ezedluleyo icela lolugwalo kodwa yasala ikhuza umhlola ngemva kokuthola impendulo yalikomishini ethi ugwalo lwe-voters’ roll olulodwa lubiza inkulungwane zamadola eMelika ezingamakhulu phose amabili, US$187,000.
Iloba enkundleni yeTwitter ngoLwesihlanu, iERC, ithe isiqoqa ukuya enkantolo incedisana lamagqwetha enhlanganiso yeZimbabwe Lawyers for Human Rights ukuyawucela ukuthi uphoqe iZEC yehlise limali ngoba inengi okungelangqondo.
Umthetho uthi ukudinda ikhasi elilodwa le-voters’ roll ephepheni kubiza idola elilodwa leMelika, iUS$1.
Ngokunjalo, isikhulumeli seZEC uMnu Jasper Mangwana utshele iStudio 7 ukuthi i-voters’ roll ibiza iUS$187,000 ngoba ilamakhasi angu187,000.
Kodwa ingcwethi ehlaziya ezombusazwe uDr. Jethro Mpofu uthe ngokubiza imali enengi kangaka, iZEC izama ukuvimba abantu abafisa ukuthola i-voters roll ukuze bayicubungule ukwenzela ukuthi kungabi lokudlelezela kukhetho lomnyaka ozayo.
