HARARE - Umhlangano omkhulu webandla leZanu PF, oweCongress, ugqitshwe ngoMgqibelo uMongameli Emmerson Mnangagwa wakhetha kutsha abasekeli bakhe uMnu Constantino Chiwenga loMnu Kembo Mohadi, ukuthi baqhubeke besezikhundleni zabo.
Ubuyisele njalo umgcinisihlalo walelibandla uNkosikazi Oppah Muchinguri-Kashiri esikhundleni sakhe.
Ingcwethi zithi akulalutho olutsha oluzalethwa yiZanu PF ngoba abantu abanengi abafakwe ezikhundleni kuyibo ekade bevele bekhona.
Phambilini kokukhetha abasekeli bakhe, amalunga eCentral Committee kanye lamanye awePolitburo, uMnangagwa ukhethwe ngamalunga eZanu PF ngokusemthethweni ukuthi eqhubeke ekhokhela lelibandla njalo abe nguye oncintisa elimele kukhetho lukaMongameli ngomnyaka ozayo.
Abangene kudale leCentral Committee bagoqela umphathintambo obona ngezemali uMnu Mthuli Ncube emela iBulawayo, uMnu Francis Nhema emela iMidlands, uMnu Lazarus Dokora emela iMashonaland Central, uMnu Nicholas Goche, uMnu James Makamba emela iMashonaland Central loMnu Mugadza kanye loMnu Paul Mangwana eMasvingo.
UMnangagwa ufake njalo uMnu Wilson Khumbula Tarugarira oweZanu Ndonga kugatsha lweCentral Committee.
Ukhethe njalo amalunga equla labadala loba iCouncil of Elders agoqela uMnu Josiah Hungwe, uAmbassador Maboi, uMnu Tshinga Dube, loNkosikazi Angeline Masuku.
Ekhuluma ngemva komhlangano lo uMnangagwa uthe ibandla lakhe lizimisele ukunqoba kukhetho lomnyaka ozayo.
Kodwa umsekeli wesikhulumeli seCCC uMnu Felix Mafa uthi akulalutho olutsha olulethwa yiZanu PF njalo uthe kabasoze bavume ukunqotshwa kukhetho.
Ocubungula ezombusazwe uMnu Bekezela Gumbo uthi ibandla le Zanu PF kalila thando lozulu ngendlela eliqhube ngayo umhlangano walo.
