UMongameli Emmerson Mnangagwa uthi ibandla lakhe lizanqoba kukhetho oluzakwenziwa ngomnyaka ozayo kulandela elikwenze eMatobo, Insiza, Buhera lezinye indawo lapho elinqobe khona kukhetho lwama by-elections kunsukwana ezedluleyo.
UMnangagwa wethule lokhu namuhla emhlanganweni wedale lePolitburo eHarare ngosuku lwakuqala lomhlangano omkhulu oweCongress, okhangelelwe ukuba uzakwenziwa phakathi kwamalanga ambalwa.
Kukhangelelwe ukuba uzakhethwa emhlanganweni lo ukuba ngunobhala jikelele webandla leli njengoba kusobala ukuthi umsekeli wakhe, uMnu. Constantino Chiwenga, kasoze angene kukhetho lokudinga ozakhokhela ibandla elibusayo.
UMnangagwa uthe amalunga ebandla leli kumele avote ngokuthula njalo abazanqotshwa bengalahli ithemba.
UMnangagwa uphinde wancoma abantu asebebumbe inhlanganiso ezitshiyeneyo ezisekela ukuthuthukisa umnotho welizwe ezinjengeye Teachers for Economic Development, Pastors for Economic Development lezinye.
UMnu. Felix Mafa, okubandla leCitizens Coalition for Change, uthi ibandla leZanu PF liyesaba ukunqotshwa kukhetho oluzayo.
Ingcwethi kwezombusazwe, uMnu. Bekezela Gumbo, uthi kukhanya engani kuyaxokozela kubandla leli ngoba kulabanye asebehlale kakhulu ezikhundleni abalakho ukukha phansi kukhetho oluzakwenziwa ngoLwesihlanu.
Sokwakhethwa inkokheli entsha yedale leCentral Committee lamanye amalunga ebandla leli awezabelo zonke azakhetha abantu azabahlala ezikhundleni kuze kwedlule iminyaka emihlanu. Kulabantu abafika phose inkulungwane ezinta – 3,500 abazangena umhlangano weCongress lonyaka.