GWANDA - Abafundi ekolitshini leJoshua Mqabuko Nkomo Polytechnic, eGwanda, bathukuthele ngemva kokuphoqwa izolo ukuthi baphatheke kumkhankaso wokugqugquzela ukwesulwa kwezijeziso zenotho ezetheswa amalunga eZanu PF.
Bathi baphendukiswe emageemasangweni ekolitshi ekuseni batshelwa ukuthi kumele baye emahofisini kamphathintambo obona ngokwenzakala eMatabeleland South, uMnu Abednico Ncube, lapho okuqhutshelwe khona limkhosi.
Omunye wabafundi laba ongathandanga ukuqanjwa ngegama ngoba esithi wesaba ukuhlukuluzwa likolitshi, uhulumende kanye lamalunga eZanu PF, uthi badlaliselwe isikhathi sabo sokutaditsha izolo.
Uthi udaba lwezijeziso ngolwamalunga eZanu PF kuphela olungelani lokwenza labafundi kumbe izizalwane zeZimbabwe.
Amazwi la asekelwe ngesinye njalo isifundi, laso esingafunanga ukubethwa ngegama. Abafundi bezikolo zemfundo yaphansi eGwanda labo baze ngobunengi kulumbuthano ngemva kokulaywa nguhulumende.
Ekhuluma kulumkhosi, Unobhala wesabelo seMatabeleland South ehofisini kamphathintambo obona ngokwenzakala kulumhlubulu uNkosikazi Lathiso Dlamini-Maseko uthe kubalukekile ukuthi amazwe asentshonalanga esule izijeziso lezi.
“Izijeziso lezi ezingekho emthethweni zenza ukuba umnotho wethu ube mubi kakhulu,” kutsho uNkosikazi Dlamini-Maseko. “Sisonke sizokulwa lodaba olukhulu kangaka olwenza ukuthi umnotho wethu uhlale wethukile njengalokhu esikubonayo.”
Umphathintambo kahulumende obona ngokwenzakala eMatabeleland South uMnu Abedinico Ncube laye uthe, “Sihlangana lapha ngohlupho esesileminyaka leminyaka eminengi kakhulu sibhekane lalo, sahlamukelwa ngamaAmericans lamaBritish layo yonke iWestern World.”
Abanye babaphatheke kulumbuthano balethwe ngamabhasi besuka endaweni ezikude. UNkosikazi Siphilisiwe Sibanda uvele ePlumtree, eMangwe, ngebhasi yeZupco.
“Ngempela ama-sanctions seyenze ilizwe lethu lawa kakhulu, ilizwe lethu seliphansi kakhulu ngendaba yama-sanctions, nga kuyamiswa ukwenzela ukuthi inhlelo zelizwe ziqhubekele phambili kube le-development elizweni lethu,” kutsho uMaSibanda.
Kodwa uMnu Thandeko Zinti Mnkandla, olilunga lebandla eliphikisayo, eleCitizens Coalition for Change (CCC) uthi lumkhankaso kawuncedi ngalutho.
“Ukuze kulungiswe indaba yezijeziso bona labo ababusayo bayakwazi ukuthi kumele benzeni,” kutsho uMnu Mnkandla. “Awusoze wephule amalungelo oluntu umhlaba ukhangele, yenalowo okufakele izijeziso ubususithi lizifakeleni.”
Amazwe angentshonalanga afakela abebandla leZanu PF abagoqela uMongameli Emmerson Mnangagwa izijeziso ebethesa umlandlu wokwephula amalungelo oluntu lokuqilibezela kukhetho.
