BULAWAYO.................Abenhlanganiso zentathelizindaba lezamalungelo oluntu eZimbabwe lasemhlabeni jikelele bakhala lemuli kaAbigail Gamanya obengumqondisi wenhlanganiso elwela amalungelo entathelizindaba eye Gender Media Connect. UGamanya ubhubhele esibhedlela seDandaro Medical Centre eHarare ngemva kokuhlaselwa yisihlabo.
Izizalwane zeZimbabwe lentathelizindaba zikhala kabuhlungu ngokubhubha kukaAbigail Rumbidzai Gamanya bethi utshiye isikhala esikhulu kumzabalazo wokulwela ilungelo lentathelizindaba ikakhulu ezesifazana.
INtathelizindaba eyingcitshi kwezebulenjini uNkosozana Koliwe -Nyoni- Majama uchaze umuyi njengomuntu obekhuthalele umsebenzi wakhe.
“Njesizwe silahlekelwe ngumuntu obesebenza gadalala labesifazane ebathuthukisa aphinde ebahlanganise labakwamanye amazwe ekubathuthukiseni silahlekelwe.”
Umqondisi weAmakhosikazi Media, uNkosikazi Sibusisiwe Ndlovu-Bhebhe uthi uGamanya ubelwela amalungelo abesifazana ebathuthukisa.
“Besisebenza kuhle loAbie ubelikhosikazi elisifundisa ngokuthuthuka kumisebenzi yokusakaza ezweni laphandle kwelizwe silahlekelwe.”
Omunye osebenze lomuyi, uNkosikazi Vivian Marara uthi uGamanya esebenze kakhulu lentathelizindaba kuhlanganisa lamalunga edale lephalamende.
“Usebenze kuhle lami lezinye intathelizindaba ezweni kamanga lapho levesifazana abasedale lephalamende usebenze labo ebalimukisa ngokuqakatheka kokulinganisa ubulili kumathuba akhona ezweni.”
UNkosikazi Lucy Yasini owathola usekelo lukamuyi uthi walisebenzisa ithalenta lakhe lokuthuthukisa abanye ezweni.
“Ngibelethuba elihle lokusebenza loGamanya buye ebetholisa amathuba alingeneyo kuye wonke umuntu asebenza laye njalo lapho adlule khona bekusala lulolukhanya lentuthuko okwenza wahlonipheka ezweni lemhlabeni jikelele.”
Umuyi utshiye indodakazi eyodwa uRuvarashe njalo abantu babuthene emzini wakhe ku 83A Harare Drive emzini weGreendale eHarare.
UGamanya uzelwe ngomnyaka ka1973 njalo usebenzele inhlanganiso ezinengi ezweni ezibalisa iMAZ, Misa, VMCZ kuhlanganisa lewofisi kaPrime Minister ngesikhathi sikahulumende womanyano ngemva kokugqiba izifundo zakhe zokuba yintathelizindaba eHarare Polythechnic lapho afunda eclasini yinye leyinye intathelizindaba elodumo ebhubhe nyakenye uSandra Nyaira.
EleSweden lamanye amazwe womhlaba ebesesebenzisana loGamanya kundaba zokucubungula locwaningo.
Uhulumende weZimbabwe laye uthi ukhala lemuli kamuyi njalo imuli ithi ikhangelele ukuba uzobekwa NgoLwesine.