Abalandela ezombusazwe labaphikisa uhulumende kaMongameli Emmerson Mnangagwa bathi kuyamangalisa ukuba idale leCabinet lisekela ukuthi kuguqulwe ezinye iziqa ezingatsho lutho ezomthetho okhangelane lokuvota oweElectoral Act.
Uhulumende uthi kumele kube leziqondiso ezikubeka sobala ukuba abafisa ukuphuma kukhetho lokudinga amalunga edale lephalamende lamakhansila, bekwenze ngemfanelo ukuze iZimbabwe Electoral Commission ithole ithuba lokulungisa amaphepha amatsha okuvota – amaballot papers.
Uhulumende uthi ufisa ukuba kwengezwe inani labesifazana labatsha edale lephalamende lakumakhansili njalo abavotayo besebenzise izithupha lamaphasipoti kuphela ngosuku lokuvota.
Abakubandla leZanu PF bayakusekela lokhu kodwa abaphikisayo bathi kunengi okumele kuguqulwe obekumele kube yingxenye yeElectoral Act Amendment Bill.
Bathi kugoqela ukuvumela abadabuka eZimbabwe abahlala kwamanye amazwe ukuba bevote kukhetho lwelizwe besemazweni atshiyeneyo, kulungiswe ugwalo lokuvota njalo kususwe abadlelana lohulumende emawofisini ekhomishini yeZEC.
UMnu. Joseph Tshuma, okudale leCentral Committee kubandla leZanu PF, uthi kulungile okwenziwa nguhulumende ofisa ukuba abantu bevote kahle.
Kodwa uMnu. Fortune Nkosinathi Mlalazi, olandela ezombusazwe, uthi kunengi okumele kwenziwe nguhulumende ukuze kuqhutshwe ukhetho olukhululekileyo eZimbabwe.