Amalunga ebandla leCitizens Coalition for Change, abatshengisele eNew York ngempelaviki bekhonona ngokwenziwa nguMongameli Emmerson Mnangagwa, bathi umhlaba wonke jikelele uzwile izikhalazo zabo.
Kodwa abakubandla leZanu PF bathi kulihlazo okwenziwe ngamalunga eCCC eMelika phandle kwendawo okwenzelwa khona umhlangano oqakathekileyo oweUnited Nations General Assembly.
UMnu. Prince Dubeko Sibanda, omele iBinga North edale lephalamende, uthi ukutshengisela okwenziwe ngamalunga ebandla lakhe kwethuse abakubandla leZanu PF. Uthi kuqonde nta abakwenzileyo.
Lokhu kusekelwa nguMnu. Effie Dlela Ncube, olwela ilungelo loluntu, othi ukutshengisela okwenziwe ngamalunga eCCC kukhumbuze abantu emhlabeni wonke jikelele ngokubhekane labantu eZimbabwe.
UMnu. Joseph Tshuma, okudale leCentral Committee kubandla leZanu PF, uyakusola lokhu.
UMnangagwa wenze imihlangano embalwa labosomabhizimusi bakwamanye amazwe eNew York lapho abacele ukuba betshale imali yabo eZimbabwe. USibanda uthi uMnangagwa kumele aqale alungise okuhluphayo eZimbabwe engakakhulumi labosomabhizimusi bakwamanye amazwe.
UTshuma uthi uMnangagwa wenza okuqondileyo.
Umhlangano weUnited Nations General Assembly uqhitshwa ngoLwesibili.