Abakubandla leCitizens Coalition for Change abatshengisele phandle kwendawo okwenzelwa umhlangano weUnited Nations General Assembly eNew York bathi uMongameli Emmerson Mnangagwa kumele ukuthi uzwile izikhalazo zabo.
Kodwa bayakusola lokhu abakubandla leZanu PF.
Bekuxokozela izolo eNew York ngesikhathi amalunga ebandla leCCC etshengisela esola okwenziwa nguMnangagwa labanye abakhe eZimbabwe.
Bathi wephula ilungelo loluntu njalo ubopha abaphikisayo mahlayana. Bakhala njalo langokhetho oluzayo besithi kumele kuguqulwe indlela oluqhutshwa ngayo.
Abakunhlanganiso yeDecember 12 Movement labo batshengisele bechothoza okwenziwa ngabe CCC.
UMnu. Tamburai Gwekwerere uthi sebehlaba umkhosi abakubandla elibusayo kulandela ukutshengisela kwabo eNew York.
Uthi lokhu kuveza ukuba uMnangagwa ukuzwile abakufunayo.
UMnu. Nhlanhla Ncube, okunhlanganiso yeFreedom Alliance, uyakusekela lokhu.
Kodwa abakubandla leZanu PF bayakusola lokhu. Omunye wabo nguMnu. Malaki Nkomo, othi kuyafana lokuthi badinga ukuba eleZimbabwe letheswe izijeziso zenotho ngamazwe asentshonalanga.
UNkosikazi Sekai Nzenza, ophethe uhlangothi lukahulumende olubona ngezamafekithali uthi uMnangagwa wenza imihlangano labosomabhizimusi eMelika ukwenzela ukuba betshale imali yabo eZimbabwe. UMnu. Believe Gaule, osekela ibandla elibusayo, uthi …
Banengi abantu abathi uMnangagwa uchitha isikhathi ngoba balutshwana osomabhizimusi abadabuka emazweni asentshonalanga abangatshala imali yabo eZimbabwe.