Gaborone..................
Noma nje uMongameli Mokgweetsi Masisi wakwele Botswana esithi yena lomunye wakhe wakwele Zimbabwe, umongameli Emmerson Mnangagwa bayazwana, kunengi okungahambi kahle phakathi kwamazwe womabili. Lokhu kugoqela abangena eBotswana okungekho emthethweni, ukuntshontshwa kwezifuyo kanye lokumemetheka komkhuhlane wamasondo lomlomo owe Foot and Mouth, obikwa uqhamuke eZimbabwe.
Umongameli Masisi ukhuluma kuhle kakhulu ngobudlwelwano beZimbabwe le Botswana. Ekuqaleni kwayonale inyanga, ngesikhathi eyethekelele kweleZimbabwe uMasisi wakhuluma ngendlela yena lomongameli Mnangagwa abazwana ngayo.
Lokhu kusolwe kakhulu ngabanye besithi kumele amazwe angomakhelwane afana leBotswana ayenelise ukukhuza uMnangagwa ngombuso wakhe ongananzi ilungelo loluntu hatshi ukuwuhalalisela.
Noma nje uMasisi ekhuluma kuhle ngeZimbabwe, lesidingo sokuthi kube lobudlelwano obuhle njengabomakhelwane, kunengi okusinda eleBotswana okudalwa yiZimbabwe.
IBotswana ikhala njalo nje ngabeZimbabwe abangena kulelozwe okungekho emthethweni. Kunakanelwa ukuthi iBotswana ibuyisela emuva abeZimbabwe abedlula inkulungwane ezingamatshumi amabili (20,000), isebenzisa imali edlula izigidi ezimbili zamapula.
Kungekude eleBotswana belithukuthele, uMasisi laye engane unwabu esithi izakhamizi ezisezigabeni ezingcelelane leZimbabwe zihlalela evalweni.
Lokhu kulandela ukuba abeBotswana bethese abeZimbabwe ukuthi bantshontsha inkomo behlomile, bechaphe lazo umngcele.
Lokhu kwadala ukuthi inkokheli yamazwe womabili iyehlangana bexoxisane phezu kwaloludaba eVictoria Falls ngoNhlolanja.
Ocubungula ngezombusazwe umnunzana Effie Dlela-Ncube uthi kunzima ukuba lomakhelwane obhekane lendubo ezifana lezeZimbabwe.
“Uma ulomakhelwane ofana leZimbabwe olendaba zakhe, lokhu kuzakuthinta kabanzi. Abaholi bangaze bezwane, kodwa phansi kuyabukungakuhlanga. EleBotswana kumele litshele ileZimbabwe ukuthi lilungise konke okudiliza ilizwe.”
Kusehlakalo esisanda kudlula, eleBotswana libike ngoLwesihlanu ukuthi lizabulala inkomo ezidlula inkulungwane ezilitshumi (10,000) ngemva kokuqhamuka komkhuhlane wamasondo lomlomo, owe Foot and Mouth, duze lomngcele weZimbabwe.
IBotswana ithi umkhuhlane lo izikhathi ezinengi uqhamuka uvela eZimbabwe, yona engafaki imzamo ukuwulwisa.
Umlimi umnzana Mhlupheki Dube uthi kumele kuvuselelwe imigoqo eyayisenqabela ukweqa kwezifuyo.
“Kwakulama cordon fences kanye lama grid, kanye lodaba lokunikeza abantu imvumo ama permits okuhambisa izifuyo. Kunganceda kakhulu ukuthi kwehlisa lomkhuhlane.”
IBotswana ithi umkhuhlane we foot and mouth, uyalimaza kakhulu umnotho wayo.
EleBotswana luthengisa kakhulu inyama kumkambo waphetsheya owe European Union, okuletha imali enhle yaphandle kwelizwe.
UDube uthi umkhuhlane womlomo lamasondo umemetheka kalula, iminwe ingalingani ekulwiseni umkhuhlane.
“IBotswana leZimbabwe kumele asebenze ndawonye ukulwisana. IBotswana ithengisa inyama phetsheya ngakho yiyo ezwa ubuhlungu kakhulu. Thina ubuhlungu bethu bunganeno kodwa bukhona.”
Ingxaki ezikhona phakathi kwamazwe womabili sezabona amazwe womabili ekhuphula imhlangano yayo yomnyaka wonke ukuthi ube yi Bi-National Commission, okutsho ukuthi ungenelwa ngomongameli bobabili.
Noma nje kumngceke ukuthi eleBotswana liyasindwa yikubhidlika komnotho kweleZimbabwe, okwakhathesi uMasisi kukhanya ezimisele ukuqinisa ubudlelwano leleZimbabwe.