Kulemuli edabuka eNkayi ehlala kwele Botswana ecela usizo ngemva kokutshelwa yindlu ngempelaviki lapho okubhubhe ingane eleminyaka emibili, kukanti umama leyinye ingane basesibhedlela, betshile kakubi.
Okwaqala kulilanga elifana lamanye ngoLwesihlanu oludleyo, kucina kulusizi kumdeni kaMnu. Discent Sibanda, ohlala eTlokweng, duze leGaborone kwele Botswana.
Lokhu kulandela ingozi yomlilo otshiye imuli kaSibanda ilahlekelwe yindodakazi eleminyaka emibili.
UNkosikazi Pinky Nsingo-Sibanda, kanye leyinye ingane yabo elenyanga eyodwa, basesibhedlela sePrincess Marina eGaborone lapho abalaliswe khona, betshe kabuhlungu.
Umakhelwane uMnu. Gift Maphosa ngomunye wababone imuli kaSibanda iwelwa yingozi yomlilo.
“Kwadubuka istofu segas, umama waphuma endlini egijima ekhala ukuthi abantwana bayatsha. Kwasekunzima abantwana besitsha, kwaze kwanceda ababethwele isichitsha mlilo. Umntwana omdala oleminyaka embili nguye owatshe kakhulu, kwathi kusasa satshelwa ukuthi setshiyile.”
Ekhuluma esesibhedlela uNsingo ulandisa okwenzakale ngoLwesihlanu, esithi umlilo waqala ngesikhathi ephekela imuli.
“Ngabilisa amanzi ngegedlela ngahlala eceleni kwestofu, ngezwa ngomdumo kuphela. Ngayawela eminyango ngazama ukuhlaba umkhosi ngehluleka, ngaze ngenelisa ukuyaphuma emnyango.”
USibanda yena uthi usele ethithibele ngalesisehlakalo esayenzakala engekho eye selela imuli.
“Ngangisembezeni, ngezwa sengizafika ukuthi sekuvele ingozi. Ngathi ngifika esibhedlela bangitshela ukuthi omunye umntwana sesitshiyile.”
Ukhala ngezandla ngoba engasebenzi, ephila ngokubamba lapha la laphayana.
“Angazi ukuthi ngingancediseka kanjani ngoba kangilalutho, bengicela izandla.”
Okhulumela imuli uMnu. Mluleki Bhebhe uthi sebeqala ukuthola usizo ebantwini ngemva kokufaka umlayezo enkundleni ezitshiyeneyo zokukhulumisana ezifana laboWhatsApp.
“Ngathi ngikhangela isimo esikhona ekhaya ngabona sisethusa kakhulu yikho ngafaka endaweni ezitshiyeneyo ngicela usizo. Abantu bayaphosela esingabaziyo ukuthi iphathise.”
Kukhangelelwe ukuthi umntwana obhubhileyo abekwe ngempelaviki, kusaqhutshwa amalungiselelo.
Ngenxa yokusilela kwemali kade kukhangelelwe ukuthi amalungiselelo omngcwabo aqhutshwe nguhulumende weBotswana.