Abazali bezikolweni ezinengi zaseZimbabwe ezivulwe izolo, babikwa bedane okwamagama ngokuphindiselwa kwabantwana abangabhadalanga indleko zesikolo ngekhaya, kungelani lokuba uhulumende uthi akula mntwana okumele axotshwe ngenxa yokungabhadali ischool fees.
Izikolo ezifana le Mutendi High, Rujeko, Ndarama High school le Zimuto High school ngezinye ebe zingavumeli abantwna ukufunda ngodaba lokungabhadali indleko zesikolo. Okuyinto ekhube inengi labazali abathi uhulumende kumele akhuze abezikolo lezi.
Omunye umzali uNkosikazi Rebbeca Sibindi ngomunye wabazali abalomntwana oxotshiweyo esikolo ngenxa yesizatho sokungenelisanga ukubhadala.
“Kuyamangalisa ukuba izikolo lezi kazilaleli uhulumende. Bafuna ukuba imali lezi zibhadalwe nge dola le Melika.Abantwana bethu kabavunyelwa ukungena esikolo bengela ma receipts okuba babhadele imali yonke. Abantwana abanengi abasoze befunde”
Lokhu kusekelwe ngu Nkosikazi Rose Chibi yena othi kumele uhulumende abophe abaphathi bezikolo abaxotsha abantwana.
“Abaphathisikolo abangalandeli umthetho ka hulumende kumele bathwaliswe amagamba avuzayo ngoba lokhu akukho emthethweni. Kumele bazwisise isimo selizwe kuqala”
UMnu Tawanda Rwodzi uthi kumele uhulumende abeke indlela zokuncedisa abantwana abangenelisi ukubhadala ezikolo.
Ezinye izikolo ezifana le Gokomere e Masvingo bezisebenzisa lamapholisa egedini ukuba axotshe abantwana abangabhadalanga imali zesikolo.
Abaphathisikolo abakhulumele le ntathelizindaba ye Studio 7 bathi abavunyelwa ukukhuluma emoyeni besithi uhulumende ubanikeza imali encane kakhulu ey BEAM ukusiza abantwana abahluphekayo.
Bathi limali ivele iyaphuza ukuza ezikolo besithi uhulumende kumele ayengezelele ngenxa yesimo selizwe.
Isikhulumeli so gatsha lwe fundo yaphansi laphezulu uMnu Taungana Ndoro uthi akula mntwana omele axotshwe ezikolo esithi abazali kumele bakhulume le zikolo.
“Akula mntwana okumele axotshwe. Abazali kumel bekhulume labaphathi sikolo ukuze babatshele ukuba bazabhadala njani abantwana baqhubeke befunde”
Izikolo zikahulumende, ezezinkozo lezizimeleyo zonke kazilandeli isixwayiso sika hulumende ngoba zifuna incwadi zabantwana ezitshengisa ukuba babhadele imali yonke.
Lokhu kuza ngesikhathi abazali abanengi besehluleka ukugcina abantwana ngenxa yomumo welizwe ngesikhathi izikolo zisiya ku themu yesithathu.