Washington DC.........
*** Lamhlanje amapholisa aweZimbabwe Republic Police abophe amalunga amabili ebandla leMthwakazi Republic Party ababili lomntwana oyedwa phandle komthethwandaba oweHigh Court koBulawayo. Lokhu kwenzakale amapholisa ezama ukuvimba abakade bezophanyeka incwadi yokukhonona ukususwa kwamalunga aweMRP, ayisificaminwe mibili ejele eleKhami Maximum Prison besiwa eChikurubi Maximum Prison eseHarare, omunye wasiwa eGwanda.
*** Namuhla lusuku lokuvulwa kwezikolo oselutshiye abazali belokukhathazeka ngendleko zesikolo esezihlawula ngedola leMelika kuthi eyinye engxenye ibhadalwe ngesilinganiso sedola esemkambo omnyama. Kusenjalo abazali baveze ukujabula ngokuthi ababalisi abakhalalanga umsebenzi kanye lokuthi imihloliso isizabhalwa yonke iphele lonyaka kungadluliselwanga kumnyaka ozayo njengeminyakeni edluleyo.
*** Ummeli weZengeza West edale lephalamende, engowebandla eliphikisayo eleCitizens’ Coalition for Change- CCC, umnumzana Job Sikhala ubikwa esesizwa ngcono lamuhla. Lokhu kuza ngemva kokuphuma kodaba lokuthi u-Sikhala umane wagula ngendlela engaqondakaliyo entolongweni ye Chikurubi Maximuma Prison edolobheni leHarare lapho avalelwe khona.
*** Umthethwandaba we Supreme Court eKenya usunqume ukuthi ngempela uMnu. William Ruto nguye owanqoba kukhetho olwaqhutshwa ngenyanga edluleyo elokudinga umongameli kulelolizwe kulandela ukuphikiswa kwempumela yalo nguMnu. Raila Odinga owayencintisana loMnu. Ruto.
***KuLivetalk namhlanje, sikhangela ukuhlukunyezwa kwabamabandla aphikisayo ababotshwa lokuvalelwa ejele mahlayana besalelwa izicelo zokuhlawulela isibambiso seBail.
Nxa lifuna ukungena kulolu hlelo thumelani umlayezelo ku WhatsApp kunombolo ezithi - 001 202 465 0318. Abafisa ukulalalela kumsakazo we Studio 7, lilakho ukusithola ngohalf past 7 ntambama kumagagase athi 909 am 4930; 6040, laku 15460 Kilohertz kuShort Wave nsuku zonke. Lilakho njalo ukusithola ngohalf past 6 ekuseni kusukela ngoMvulo kusiya ngoLwesihlanu kumagagase athi - 909 am, 4930, 7270, laku 9885 Short Wave.