GWANDA - Izakhamizi endaweni ezitshiyeneyo zeMatabeleland South zithi ukubhidlika komnotho osokuthwalise inengi nzima sokubangela ukuthi abafundi abanengi abangamantombazama batshiye isikolo ngezizatho ezigoqela ukuzithwala.
Ukutshabalala komnotho kubikwa sekuphoqa amantombazana ukuthi aziphandele ukuze athole imali yokuthenga indingeko ezifana lempahla ayisebenzisa lapho esesikhathini ngoba inengi labazali lingasebenzi.
Isakhamuzi seInsiza uNkosikazi Matilda Dube uthi lokhu sokufake ikusasa labantwana engozini enkulu. Wengeze wathi kuyadingeka ukuthi kuvuselelwe umnotho ukuze abafundi babelethemba lokuthi bengafunda bazathola imsebenzi.
Umqondisi wenhlanganiso yeLesego Memorial Trust, yona enakekela abantwana abaswelayo, uNkosazana Gugulethu Mnkandhla, uthe abanye abasakhulayo sebethengisa locansi ukuze bathole okokuziphilisa.
Amazwi kaMaMnkandla agcizelelwe nguNkosikazi Sethekele Tshabangu, umqondisi wenhlanganiso elwela ukulondolozwa kwamalungelo abesifazana eyeWomen Development Association of Zimbabwe.
IStudio 7 yehlulekile ukuthola amanani kuhulumende aveza ukuthi bangaki abantwana asebephume esikolo bengakaqedi lonyaka.
Kodwa nyakenye isikhulumeli sogatsha lwezemfundo uMnu Taungana Ndoro ubike ukuthi abafundi abafika inkulungwane ezilitshumi batshiya isikolo ngomnyaka ka2020 njalo phose ingxenye yabo bebezithwele.
