Johannesburg.............
Ngesikhathi sekusele inyanga ezine kuphela ukuthi amapermit ohlobo lweZimbabwe Exemption Permit (ZEP) aphiwa izizalwane zeZimbabwe eziphose zifike izinkulungwane ezingamakhulu amabili (178,000) aphelelwe yisikhathi, abanye beZimbabwe bathi sebelungiselela ukubuyela ekhaya ngokwesabela impilo zabo nxa lezi ngwalo zingaphelelwa yisikhathi ekupheleni kwalonyaka.
Ugatsha lwendaba zasekhaya lusanda kubhalela abaqatshi incwadi lubatshela ukuthi baqaphele ukuthi kulezisebenzi zabo ezilamapermit la okungafuzanga ziqhubeke zisebenza nxa zingasatholanga olunye uhlobo lwamapermit.
Emaphepheni aphanyekwe yilolugatsha emthethwanda, luthi kulabantu abazinkulungwane eziyisithupha kuphela (6,000) asebefake izicelo zokuthola olunye uhlobo lwamapermit. Lolugatsha luthi alubuyeli emuva ngokwesulwa kwamapermit la kungakhathalekile ukuthi kulenhlanganiso eziphikisana lalokhu emthethwandaba.
Ngakokulunye uhlangothi amaqembu alwela ukuthi abokuza laba babuyiselwe kubo lawo aqhubekela phambili ngemikhankaso yokuxotshwa elizweni kwalabo abangelancwadi ezisemthethweni.
Isizalwane seZimbabwe umnumnzana Greatman Mkhwebu uthi sebezithole sekufanele balungiselele ukubuyela ekhaya ngoba kuyacaca ukuthi kabasafuneki kweleSouth Africa.
“Ngiready ukuzibuyelela ekhaya angilaproblem. Ngilomuzi wami. Ifamily yami layo ibivele ingidinga isikhathi esinengi. So ma sengisekhaya ngizakwazi ukuthi ngilungise amanye ama mistakes lapha lalaphaya. Yes khona yinto esifikele iphuthuma okokuthi inhlelo zethu besingakaziqedeleli ukuthi ma sifika ekhaya sikwazi ukuthi senze nani nani.”
Le yinto egcizelelwa ngesinye isizalwane seZimbabwe unkosikazi Mercy Mvundla yena othi loba bengazi ukuthi bazaphila njani eZimbabwe amathemba okuhlala kuleli aqhubeka etshabalala ngakho inengi selilungiselela ukuyaphila eZimbabwe.
“Ngiyabona abantu bazama ukuqoqelela khonalokho abalakho abakusebenzeleyo bakuhambise ekhaya ukuze bafike bakusebenzisele. Abalemadlana zabo yikwenza into ezinjengokugebha imigodi, ukuthenga izitofu zehasi, ukuthenga amafridge asebenzisa igasi.”
Bakhonake abesebezimisele ukuthi lobanje amapermit abo angaze aphelelwe yisikhathi, bazaqhubeka bezizamela impilo kweleSouth Africa. Kodwake inengi lalaba lalo selethuswe yinkulumo esanda kwethulwa yisikhulumeli sebandla elibusayo ele African National Congress umnumnzana Pule Mabe.
Umnumnzana Mabe uthi iANC layo ayisela mandla okuvikela abaselizweni ngokungekho emthethweni ngoba izakhamizi zakweleSouth Africa zithukuthele zaganunwabo ngamacala adalwa ngabanye abantu bokuza.
Izolonje lokhu izakhamizi ze Pietermaritzburg KwaZulu Natal zingene emigwaqweni yaleli dolobho ngobunengi zidudula bonke abantu bokuza abathengisayo zisithi abatshaqe imitshaqana yabo babuyele kubo.
Ngesikhathi esethekelela eleSouth Africa emavikini asanda kwedlula umphathintambo obona ngobudlelwano beZimbabwe labanye amazwe umnumnzana Frederick Shava uthe uhulumende weZimbabwe uzilungiselele ukwemukela labo abangasoke benelise ukuvuselela amapermit abo. Kodwake le inkulumo ilethe intukuthelo kwabanengi besithi bebekhangelele ukuthi uhulumende abancedise ukwengezelela isikhathi sala mapermit hatshi ukuthi baye ekhaya belanda ubuyanga lenhlupheko.