Abantu abanengi koBulawayo bathi akulancedo ukuyahlola amagama abo kuluhlu lwabalelungelo lokuvota olwe-voters’s roll ngoba ibandla elibusayo kalisoze liphume embusweni lanxa linganqotshwa kukhetho.
Abakhangele ezokhetho lenhlanganiso ezizimeleyo bathi kuyethusa kakhulu ukuthi abantu abalandaba lokuyahlola amagama abo kuluhlu lwabalelungelo lokuvota olwe-voters roll bona bebhakane lobunzima obumangalisayo eZimbabwe.
Omunye othi kazihluphi ngokuhlola ukuthi igama lakhe likhona kumbe kalikho nguMnu. Madodana Fuyana, ohlala eMpopoma koBulawayo.
"Indaba zokuvota ingani azilancedo ngoba khathesi kuyatshiwo ukuthi sikhuthazwe ukuthi siyehlola amabizo but singaze sivote kuyabe kulokhu kufanana. IZANU iyabe ilokhu ingena, kungani siyabe sisenzela yona ukuthi vele sithi ihlezi iyiyo ephambili. So angiboni ukuthi mina ngingaze ngicheck ibizo ngenzeni abantu lokhu bekhuthazwa besenzani. Bakhuthaza nje ukuthi bona bangene bazibonele bazibusele embusweni wabo bahlale lokhu besiwisela phansi bona besiyaphambili.
“Njengalapha koBulawayo kunengi izinto ezinengi aziphumeleli, kuma mines khathesi kunje yibo abalento ezinengi bayabe lokhu besincindezela besiyaphambili. Yibo aba investor izinto ezinengi bethatha konke, amaplazi abanye besuka khonale bezolima yisame bantu beZANU abathathi ndawo zethu."
UNkosazana Mercy Moyo, welokitshini leLuveve akazake vele abhalisele ukuvota.
"Ireason engingafuni uku-register ukuvota yikuthi iparty le ekhona iyenza ukuthi impilo isiwomele thina. Njengabantu abadinga ama piece job into zomile amakhiwa awala mali elizweni akulamali akulamsebenzi siyahawula. So, angiboni ireason yokuthi ngiregister ukuvota ngoba igovernment le ekhona vele isibamba butshapha thina abantu."
Abanye abalutshwana bathi bahlola amagama abo ku-voters roll besebenzisa omakhalekhukhwini. UMnu. Patson Moyo ngomunye wabafinyelele lolugwalo esebenzisa umkhalakhukhwini.
"Sengihlolilr ibizo lami ku-register yokuvota. Ngadayila inombolo ethi *265 ukwenzela ukudingisisa ukuthi ngikhona, ngathola ibizo lami likhona, hayi ngathola ukuthi likhona sibili ukuthi ngizaphinda ngivote futhi. Ngike ngavota ilast elections edlulileyo futhi hayi kukhaya khonke kukahle sibili."
UMnu Ntando Ndlovu, isikhulumi sika Nkosazana Thoko Khupe, okubandla leCitizens Coalition for Change, uthi abekomishini eyeZEC ayizange isabalalise umbiko wokuvulwa kohlelo lokuyahlola amabizo ku-voters roll.
"Kuliqiniso ukuthi abantu abanengi kabakayihlola amagama abo kugwalo lwalabo abazavota ngomnyaka ozayo. Esikubona kuyimbangela yikuthi iZEC ayizange iyenze okwaneleyo uku-advertiser uhlelo lolu njalo amalanga afakiweyo malutshwane ukuthi abantu bonke beZimbabwe ababhalisiweyo bacheck amabizo abo ku-voters roll."
Uyaphambili uNdlovu ekhuthaza abantu ukuthi bayehlola amagama abo kuVoters roll ngoba kungaba lokunye okuyabe umbanisiwe kulungisiswe masinya phambilini kokhetho.
"Lokhu kuzaba lomthela omubi kukhetho oluzayo next year ngo 2023 ngoba abantu abanengi bayathola amabizo engasekho kuvoters roll kumbe sebetshintshiwe bahanjiswa kwezinye indawo njengoba sikwazi ukuthi iZec sike yachaza phambilini ukuthi amabizo angu 180 000 sewakhitshwa kuvoters roll.
“KoBulawayo khonapha kuphela iZEC ichae ukuthi eCowdray Park kuWard 28 bakhiphe abantu abangu1,000 ku-voters roll okungekho emthethweni njalo okungaqedakaliyo ukuthi kuyenziwe njani. So, ngokunjalo sithi abantu kuqakathekile ukuthi bahambe kuma polling station abo bayekhangela ukuthi amabizo abo abhalwe kuhle njalo alokhu ekhona yini kuluhlu lwabantu abazavota kuelections yomnyaka ozayo."
Ibandla elibusayo leZanu-PF lalo likhuthaza intsha ukuthi ayiphakame iyehlola amabizo Ku-voters roll. UFreedom Mrechu, omunye wabakhokhela ibandla leli koBulawayo, uthi kuqakathekile ukuba bakwenze lokhu.
"Njengogatsha lwabasakhulayo siyakhuthaza ontanga ukuthi behambe bayekhangela amabizo abo kuvoters roll. Kulohlelo olwe ZEC oluyaphela mhlaka 26 lapho abantu abakhuthazwa khona ukuthi behambe bayekhangela amabizo abo ukuthi bakhona yini kuvoters roll so that beyenelise ukuvoter ngomnyaka kumbe ngokhetho oluzayo luka2023."
Phose zonke indawo ezifakwe ukuthi abantu bazohlola amabizo abo kuvoters roll bekutshaya umoya abantu ababuyi.Ikhomishini ebona ngezokhetho eyeZimbabwe Electoral Commission iqhuba uhlelo lukazulu lokuhlola amagama kuluhlu lwabalelungelo lokuvota njalo lolu hlelo lugqhitshwa mhlaka 26 Ntulikazi.