Harare............
Uzulu waseZimbabwe usola inkulumo yesinye seziphathamandla zeZanu PF, umnumzana Abton Mushayanyika onguBishop ebandleni lenkonzo ye Habakkuk Apostolic Faith Mission, yokuthi akekho ongambopha ngoba eyiZanu PF ngokwayo.
Umfanekiso oweVidiyo ka-Mushayanyika, esitsho lawamazwi wokutshotshozela abeZanu Pf ukuthi babulale umkhokheli webandla eliphikisayo ele Citizens Coalition for Change ( CCC ), umnumzana Nelson Chamisa, iyabhoda ezinkundleni zebulenjini.
Lokhu kwenzakala ngesikhathi sekubotshwe abambalwa abamabandla aphikisayo abagoqela amalunga edale lephalamende awe CCC, omnumzana Job Sikhala lo Godfery Sithole, abetheswa umlandu wokutshotshozela udlakela esililweni somunye wamalunga alelibandla owatholakala efile, uMoreblessing Ali. Ababali laba ndawonye labanye abalitshumi lantathu sebehlale entolongweni okwesikhathi esedlula inyanga icala labo lingathoniswa.
Omunye wabasekeli besikhulumeli se CCC, umnumzana Ostallos Gift Siziba uthi balethemba lokuba izokhangelisiswa ngabomthetho linkulumo kaMashayanyika.
“Thina njenge CCC, lokhe sikhulumisana labamapholisa, ukubana silungisise indaba ke ye-violence ngenxa yokuthi asikhangelelanga ukubana ke, kube ke labantu abathi bona bangaphezu komthetho. Ngenxa yokubana, ikhakhulu nxa sisiya kukhetho, ayisiyo nto esizayivumela ukubana umuntu ke, ebe yisigilamkhuba, ehambe nje engabanjwanga ngamapholisa njalo kungathonisiswanga ngendaba yakhe. So, le yindaba esizayiphesuwa and asisoze samtshiya ngenxa yokuthi thina singama-citizens, silalo ilungelo sokubana simthathe, simhambise ke emapholiseni.”
Abanengi abagoqela ingcwethi kwezombusazwe, umnumzana Pride Mukono, bayayisola linkulumo besithi ayilunganga.
“Kutshengisela ukuthi yona i-Zanu Pf iyakhuthaza abantu bayo ukuthi babe yizigilamkhuba lezigebengu, beyethusele abantu njalo bebe befuna ukubalimaza ngokuthi ngamalunga eZanu Pf njalo kasoze abotshwe. Kutshengisela njalo ukuthi wona amapholisa lamadale emthethwandaba, akalawo amandla okukhangela ukuthi bengakwanisa ukubamba abantu beZanu Pf ngoba babuswa yiZanu Pf. Abakho independent, abakwanisi ukuzimela bona bayenze imisebenzi yabo, leyo ebhalwe emthethweni.”
Okukhulunywa nguMashayanyika ukuthi ngeke abotshwe ngoba engumuntu weZanu Pf u-Mukono uthi yinto eyangisayo kakhulu.
“Njalo kutshengisela ukuthi iZanu Pf yona, isizifake ekhoneni, isizifake kubanga elinzima lokuthi iqhubekele phambili ibusa ilizwe. Ngoba akukho abantu abangafuna ukubuswa yizigebengu lezigilamkhuba okungapheliyo. So, sikhangelele ukuthi abantu abanengi bazakuthi hayi, kubuya u-2023, abasoze bavotele i-Zanu Pf, bazavotela yona i-opposition njalo sibona ukuthi, i-opposition ingawina, abantu abanjengaboMashayanyika, bazangena emajele ngoba beyizigilamkhuba lezigebengu.”
Lumsakazo uxhumane lesikhulumeli samapholisa uAssistant Commissioner Paul Nyathi ukuzwa icele labo, wathi kumele kube yisikhulumeli samapholisa esigabeni seNkabazwe lapho okwenzakala khona lesi sehlakalo, u-Inspector Emmanuel Mahoko okhulume phezu kwalolodaba.
Imizamo yokuxumana loMushayanyika ngokwakhe ayiphumelelanga njalo asenelisanga ukuthola okuvelela kwabeZanu Pf, ukuzwa icele labo kuloludaba njengoba ubelokhu engakayiphenduli imibuzo ayithunyelweyo ngewhatsapp, umqondisi wezokukhulumisana lokukhitshwa kwemibiko, umnumzana Tafadzwa Mugwadi.