Ibandla leZanu PF lithi abasanda kwethula imibiko ethi kulokuxabana okumangalisayo phakathi kuka Mongameli Emmerson Mnangagwa lomsekeli wakhe, uRetired General Constantino Chiwenga, ngabantu abengelangqondo abalakho ukujeziswa kabuhlungu ngokufisa kwabo ukuba umongameli asuswe esikhundleni kumbe engancintisi kukhetho oluzayo.
UMnu. Tafadzwa Mugwadi, obona ngokwethulwa kwemibiko kubandla leZanu PF, uthi uMnu. Godfrey Tsenengamu loMnu. Jim Kunaka, abake bazibamba esidukwini kubandla leli, bakhohlakele ngakho akumelanga bekhuthaze uzulu ukuba ahlamukele uMnangagwa.
UTsenengamu loKunaka bathi uMnangagwa seyehlulekile ukubusa. Bathi kumele atshiyele isikhundla olakho ukunqoba kukhetho oluzayo. UKunaka uthi uMnangagwa loChiwenga bavumelana ukuba uMnangagwa uzabusa okweminyaka emihlanu kuphela kulandela ukususwa kowayengumongameli, umuyi uRobert Mugabe, esikhundleni ngomnyaka ka2017.
UMugwadi utshele iStudio 7 ukuthi uTsenengamu loKunaka baxotshwa kudale kubandla leli ngakho-ke abalalungelo lokukhuluma ngokwenzakala kubandla elibusayo.
///ACT MUGWADI
“Sesikuzwile okwethulwa ngabantu laba abangelangqondo uTsenengamu loJim Kunaka abathi uMnangagwa ulwisana lomsekeli wakhe. Asikwazi lokhu thina. Ukudonsela ibutho kukho konke lokhu yibutshapha obumangalisayo. Njengomuntu ophethe uhlangothi olwethula imibiko kubandla elibusayo, ngithi abantu kumele bengalandeli okwethulwa nguTsenengamu loKunaka abaxotshwa kubandla lethu. Okwamanje uKunaka kalabandla kuthi loTsenengamu akuqedakali akwenzayo.
“Lokhu abazama ukukwenza yikudlala ngomlilo. Sithi kumele bekwekele ngoba kuzabahlupha kakhulu. Ungakhuluma uchothoza uMnangagwa njengomuntu okhokhela ibandla leZanu PF kodwa nxa usukhuluma ngokuba ngumongameli welizwe kwehlukene kakhulu. Ukunakana nje ukuthi asuswe esikhundleni okungekho emthethweni kungalethela umuntu uhlupho olumangalisayo. Sicela ababili laba bekwekele lokhu. Siyacela ngoba sebesenza okungekho emthethweni. Kumele bethule zwi ngoba balakho ukuthwala nzima ngabakwethulayo.”
UTsenengamu utshele iStudio 7 ukuthi akukhulumileyo yikho lokho njalo kasoze atshele umphakathi ukuthi ubezikhulumela nje.
UMnu. Ntokozo Msipha, isikhulumeli senhlanganiso yeTyson Wabantu efisa ukuba uMnu. Savior Kasukuwere angene esikhundleni sikamongameli, uthi uMnangagwa kumele asuke ngenkani njengalokhu akwenza egunqula uMugabe.
UMnangagwa usekhethwe yizabelo zonke ukuba amele ibandla leZanu PF kukhetho lokudinga umongameli omutsha ngomnyaka ozayo. UChiwenga uthi uyakusekela lokhu.