Ngesikhathi kulungiselelwa ukhetho lomnyaka ozayo, inhlanganiso ezimeleyo eye Crisis in Zimbabwe Coalition ibambe umhlangano labanye abeZimbabwe abahlala kwele Botswana ukuzwa indubo ababhekane lazo, njalo lokukhulumisana phezu kokhetho oluzayo.
Inengi lithi liyafisa ukuyavota kodwa kusehlula ezimalini kanye lokuthi abalamaphepha aqondileyo okuhambisa.
Emhlanganweni obanjelwe eGaborone ngoLwesithathu, abeZimbabwe bakhale ngokuthi bayahlupheka kweleBotswana. Abanye bathi abayenelisi ukufinyelela usizo ezibhedlela ngenxa yokuthi kabalamaphepha kukanti abanye njalo bakhala ngokugijinyiswa ngabomthetho.
Bathi balesifiso sokuthi bafike ekhaya ngomnyaka ozayo ukuyavota, kodwa njengakolunye ukhetho, bangasuka bayehlulwwe yimali lokuthi abalamaphepha aqondileyo awokuhlala elizweni kumbe awokuhambisa.
Ekhuluma emhlanganweni lentathelizindaba, umqondisi weCrisis in Zimbabwe Coalition, uMnu. Blessing Vava, uthi bazwile izikhalazo zabeZimbabwe kweleBotswana
“Bakhulume kakhulu ngendaba zokuswela amaphepha kanye lokwehluleka ukufinyelela inhlelo ezinengi, kanye lokuhlukunyezwa. Njalo okuqakathekileyo, bathi bafuna ukubuyela ekhaya ukuyavota.”
Kukanti uMnu. Modise Maphanyane, omele umanyano wenhlanganiso phezu kwenkinga ezibhekane leZimbabwe eyeBotswana Civil Society Coalition Solidarity on Zimbabwe, uthi kuyatshengisa ukuthi kungaba lodlakela olubi kukhetho oluzayo.
Uthi ngalokhu, kumele inhlanganiso ezizimeleyo ziphakame zikhulume ngalizwi linye.
“Kunengi esikwenzileyo njenge nhlanganiso yeBOCISCOZ ukuphathisa abeZimbabwe. Sakhuluma ukuthi owayengumongameli, umnunzana Ian Khama, akhulume kakhulu ngenkinga ezaziseZimbabwe. Lokhu kwaphathisa kakhulu.”
Umqondisi wenhlanganiso ebona ngelungelo loluntu, eyeDitshwanelo, unkosikazi Alice Mogwe uthi kuzayenziwa imzamo ukuthi kuphathiswe abeZimbabwe kweleBotswana ukuthi bayevota ngomnyaka ozayo.
“Sancedisa ngomnyaka ka2008 ukuthi abantu bayevota, kumgceke njalo ukuthi usizo lwethu soludingakala njalo. Sizabambisana lenhlanganiso ezifana leCrisis in Zimbabwe Coalition.”
Owenhlanganiso ebona ngabeZimbabwe kweleSouth Africa, uMnu. Nqabutho Mabhena uthi kuqakathekile kakhulu ukuthi abantu abangaphandle kwelizwe bahambe bayevota ngomnyaka ozayo.
“Kuqakathekile ukuthi bayevota kulokuthi baqhubeke besola uhulumende owakhethwa ngabanye. Lathi siyaqoqonsela ukuthi abantu bahambe bayebhalisa ukuvota, ukuthi uma usuku lokuvota lufika labo bahambe bayevota.”
Kulokukhathazeka ukuthi udlakela lungaqonga ngesikhathi kulungiselelwa ukhetho lomnyaka ozayo, sekubulewe amalunga athile ikakhulu, abebandla eliphikisayo eleCitizen Coalition for Change.
Kukhetho luka 2008 olwalulodlakela kakhulu, inengi leZimbabwe labalekela kweleBotswana lapho elathola khona ubuphepheli.
Inhlanganiso yeCrisis in Zimbabwe Coalition ihlangane njalo leziphathamandla zogatsha olubona ngobudlelwano beBotswana lamanye amazwe.