Ukwanda kwezehlakalo zodlakela lokuthunjwa kwabantu kulezinsuku kwenze inhlanganiso yeZimbabwe Christian Alliance yenze umkhankaso wokukhuthaza uzulu ukuba alondoloze ukuthula.
NgoLwesithathu inhlanganiso le iqoqe abantu abafole elokitshini leMakhokhoba koBulawayo phansi kwalumkhankaso.
Amabandla ezombusazwe amane agoqela iZANU PF, ZAPU, CCC leNational Patriotic Front aphatheke kuhlelo lolu emanyane labeZimbabwe Christian Alliance ekufoleni belenjongo yokukhuthaza ukuba kube lokuthula eZimbabwe ngesikhathi ilizwe lilungiselela ukhetho olukhulu oluzayo.
UMnu. Useni Sibanda, umqondisi weZimbabwe Christian Alliance, uthi bayafundisa abezombusazwe ngokuthula nxa bekhankasa bengamabandla atshiyeneyo.
“Ama local peace committees lawa siyabe siwaqoqa njalo sibafundisa ngendaba zokuthula lokuthi bangasebenzelana njani behloniphana.lngxenye yamalocal peace committees ekhona yikuthi siba lamapolitical parties ababa yingxenye yethu ngakho siyawa trainer kuhlelo okuthiwa ngama peace campaigns ukuthi bangakhankasa njani ngokuthula njalo behloniphana bengasebenzisi udlakela abeMakhokhoba sibabone behlangana ukuthi batshengisele emuntwini wonke ukuthi bayakwanisa ukusebenzelana bonke njalo imbono etshiyeneyo ayitsho ukuthi abantu sekumele batshayane bebulalane.”
UMnu. Misheck Gumbo, owebandla leZanu PF, uthi umongameli wabo uhlezi ebakhuthaza ukuthi balondoloze ukuthula.
"Okungenze ngithande into yokumatsha ngibone inhle kakhulu ngoba iyayenza ukuthi ukuthi kube lokuthula. As Zanu Pf our president is always preaching about peace lokhu okobudlwangudlwangu asikufuni ngithanda ukuthi ngibonge abafundisi kakhulu ukuthi labo are preaching peace.”
UMnu. Manuel Mukuli, owebandla leNPF, uthi iZimbabwe isidlule kodlakela olumangalisayo okubulewe abantu abanengi.
“Kungijabulisile kakhulu ukuthi iChurch isihlanganisile njengamabandla atshiyeneyo lalokhu esiyabe sikuyenza singabi leViolence. Ngiyakhuthaza kakhulu abantu esiyabe sihamba labo sikhankasa kubamnandi ukuthi kungaliwa. Layo iZimbabwe isikhulile ezintweni ezinje asibambane senze into eright ilizwe lethu lakheke mnandi.”
UMnu. Andrew Ndlovu, unobhala jikelele weZapu, uthi ibandla lakhe alilawo umkhuba wodlakela kusukela kudala.
“IZapu yona ngokwayo ayisiyo party ele violence ngibona kungela sizatho ukuthi abantu beZimbabwe bebele violence or any political party iyenze iviolence ngoba impi yenkululeko yayivele yayilezithatho okunye kuyikuthi kube lamalungelo okuthi omunye lomunye avote ngendlela econstitutional esithi yione man one vote.Ma ngikhangela amaChurch vele mdabuko wawo abevele ekhuthaza abantu ukuthula lokubambana lokulingana kwabantu ezigabeni zonke.”
UMnu. Shadreck Sibanda, owebandla leCCC, uthi bebekhuthazana ukuthi bengaphatheki kubudlwangudlwangu obubakhona kwezombusazwe.
UNkosikazi Mellisa Ntini isakhamuzi sakoBulawayo uthi inengi beselisesaba ukuthi lizakale ukuthi bami ngaphi ngokubulalana okukhona.
“Lokhu okwenzakale eMakhokhoba siyakubongela kakhulu njengezakhamuzi,abahlali beZimbabwe inengi labantu sebesesaba lokuthi babonakale ukuthi ngabaliphi ibandla ngalokhu kubulalana okukhona ukubotshwa.Siyathaba ngalokhu ukwenziwa ngamaChurch ngoba abantu bayakhohlwa ukuthi uNkulunkulu nguye ohlelayo konke njalo lebhayibhili liyakhuthaza uthando lokuthula sikhathi sonke.”
Inhlanganiso yeZimbabwe Christian Alliance ithe lokhu okwenziwe emzini weMakhokhoba kuzasiwa kwezinye indawo, osokubunjwe amakhomiti angamatshumi amane lasithupha (46), abizwa ngokuthi ngamaLocal Peace Committees, asezabelweni ezitshiyeneyo eZimbabwe ukuthi bakhuthaze ukuthula lokuhloniphana beyizizalwane zalelilizwe ezilembono etshiyeneyo.
Ukufola kwanamhlanje kuqhutshwe ngabamabandla ehlukeneyo kanye lezakhamizi zeMakhokhoba, abantu bekhuthazana ukuthi balondoloze ukuthula izikhathi zonke. Lokhu kulandela ukubulawa kowayelilunga leCCC emzini weLobhengula, ko Bulawayo, umnumzana Langelihle Dube, ukuthunjwa lokubulawa kwelinye njalo Ilunga leCCC eChitungwiza, duzane le Harare, uNkosazana Moreblessing Ali kanye lodlame oluqhamuke ngemva kokufunyanwa kwesidumbu sakhe lokutshiswe kwemizi yamalunga ebandla leZANU PF kanye leCCC.