Abavela eZimbabwe abahlala eSouth Africa bathi ukukhuphuka kwentengo yempahla ezitolo sokubathwalise amagabha avuzayo njalo lanxa belokhe bethumela ekhaya, akusafani lakuqala.
UNkosazana Memory Ncube uthi uthenga impahla ephathisana labantu okuthiwa ngama "runners" ngoba kutshiphile kulabomalayitsha. Inkampani yama runners igxile eSouth Africa kodwa leyo runner ithenga eZimbabwe.
Uqhubeke wathi uyathumela i runner uluhlu lwempahla azifunayo aphinde afake imali ezathenga ngayo leyo runner ebhukwini layo lebhanga eseSouth Africa.
Wengeze wathi kungcono ukuthumela impahla kulemali.
"Mina angithumeli imali ekhaya ngoba ungathumela imali uyatholu'ukuthi balezikwelede kumbe ezinye izidingo ezifuna imali uzwe sebekhala ngendlala futhi....ngithumela nxa kuyimali yama school fees yabantwana kumbe amaphilisi nxa kuyikuthi umama uyagula kumbe ubaba uyagula," kutsho uNkosazana Ncube.
Uqhubeke wathi akulula ukuhlala labantwana ekhaya, lanxa impilo ilukhuni, ngoba inengi lingahlalisekanga eSouth Africa ngenxa yodlakela olubhekiswe kwabokuza olwe xenophobia kanye lokungacaci kokuthi uhulumende uzanikeze yini imvumo yokulungisa amaphepha okuthi beqhubeke behlala kulelolizwe ngokusemthethweni.
Imdeni eminengi eZimbabwe iphila ngemali lempahla eyithola kuzihlobo ezisebenza emazweni agoqela eleSouth Africa, Botswana, laphetsheya kolwandle, ngenxa yokubhidlika komnotho welizwe,
Lalela lingxoxo ngokugcweleyo.
