Ezinye izakhamizi zesiqintini seSizinda esingcelezane ledolobho leVictoria Falls, esigabeni seMatebeleland North, zithi ibandla elibusayo eleZanu PF kalisoze liphume embusweni ngomnyaka ozayo oka2023 ngoba liyabanakekela ngokupha abantu inhlanyelo yokulima lokudla ngesikhathi lesi sendlala.
Kukanti abamabandla aphikisayo bathi akulanto eyenziwa libandla leli kunje akulantuthuko kunhlangothi zonke zempilo ikakhulu kwezomnotho okudala ukusilela kwemisebenzi.
Inengi labahlali beSizinda lithi iZanu PF ibanika umhlaba wokulima njalo liyabanakekela ngendlela ezinengi.
UNkosazana Violet Sibanda ngumfelokazi ohlala kulumango. Yenake uthi kungasi hulumende ommcedisayo kakwazi ukuthi ngabe uyini.
"Ngincediswa yihulumende kukho konke nje. Sibambene ngayo iZANU yonaleyi. Siyayithanda kakhulu hanti libandla elibusayo. Bayasinika ukudla sibili bayasibusisa, abantwana bayafunda ezikolweni abanye bayabhadalelwa yihulumende, abanye ngama donor lawa abakhona, yonke indawo yiZANU kuphela. Ah! ngomnyaka ozayo sizatshaya kuhle ngebandla elibusayo, liyahlala libusa ibandla leli. Yikho sisithi phambili ngebandla elibusayo."
Amazwi kaMaSibanda agcizelelwa nguMnu. Mathebula Gwizi, umsekeli walelibandla.
"Ibandla elibusayo, ibandla elilomhluz’omkhulu lisinikeza ama inputs, siyathola ukudla, sithole amagrants, izimali … Lapho-ke Mthwakazi omuhle ngiyalinxusa ngithi asizeni sonke sisekele ibandla elihamba phambili, elethu iZANU PF."
UMnu. Jabulani Ncube uthi ekugenqulweni kombuso kowayengumongameli, uRobert Mugabe, babelethemba lokuthi izinto ziyzoguquka, kodwa udubo luyaphambili.
"Thina eZimbabwe sasithembele ukuthi njengooba kuphuma uMugabe sesizathola lathi ukuthi siphile. Ibandla eliphikisayo sasithembela ukuthi lizathola ukuncediswa kodwa akulanto esiyitholayo. So, thina hayi njengomphakathi asiboni ukuthi ezombangawe zisinceda ngani."
Ezinye izakhamizi zithi amabandla amakhulu awezombusazwe akhona manje akancedi lutho kumele kube lelinye ibandla elizakhangela inhlupho zabantu. UNkosazana Mirriam Dube ngomunye wabolombono lo.
"Thina lapha sesithwele nzima izinti sezinzima, sesicela ukuthi ngabe kulelinye ibandla elibakhona sibili elisiphathisayo ngoba, yeyi, sesithwele nzima sibili. Izinto ziyadula emashop azithengeki asisakwanisi, lemsebenzi asiyitholi vele, ayi, kunzima kakhulu.”
Kambe amabandla la omabili amakhulu eleCitizens Coalition for Change leZanu PF seyehlulekile yini?
UNkosazana Dube uthi, “Sehlulekile sibili. Ayazama sibili kodwa asiboni ukuthi asincedisa ngani, ithwele nzima asitholi lutho lakiwo amabandla angakhona."
Umgcinisihlalo webandla leZanu PF esabelweni seMatabeleland North njalo engumphathintambo walesigaba, uMnu. Richard Moyo, uthi ibandla lakhe alihlalanga phansi selilungiselela ukhetho lomnyaka ozayo.
"Thina njenge Mat North province ngimele iZANU PF, lonyaka ngumnyaka woku mobiliser sivuselela ama structures ethu ama-cell, ama-branches ethu ama-district silungiselela ama-election azakubakhona next year sidinga inumber kamongameli i-fivemillion votes and njenge province yethu kulokuthula asilabudlwangudlwangu eprovince yethu lokhu into zokulwa sikubonela kwamanye amaprovince. Thina eMat North kubanjenwe njalo sisebenza siyi unity sisebenzela ibandla lethu leZANU PF liwine ama elections."
Kulumhlubulo welizwe akukabi lodlakela lokudlephana kwabasekeli bamabandla ezombusazwe njalo abantu balesisigaba bathi abafuni kuhlukuluzana nxa sokukhankaselwa ukhetho lomnyaka ozayo ka2023.