Bayajabula abanye abantu ngokwenziwe ngamalunga ebandla leMthwakazi Republic Party abatshengisele ngoLwesibili esigodlweni selizwe ePitoli kwele South Africa lapho ahluthune ifulegi yeZimbabwe, ayinyathela asephanyeka eyabo kuleyondawo.
Bakhona njalo abakhala ngokwenziwe ngamalunga eMRP abathi akumelanga kutshaphazwe ifulegi yelizwe. Abasekela okwenziwe ngamalunga la bathi iziphathamandla zesigodlo sakwele Zimbabwe ePitoli kazilaleli izikhalazo zikazulu njalo sokulesikhathi bekhala abadabuka eMatabeleland leNkabazwe abathi bafuna ukuthi babe lelizwe elizimeleyo hatshi ukuba phansi kukahulumende webandla leZanu PF.
Sokulesikhathi amalunga eMRP anika isigodlo lesi incwadi ejulileyo eveza ukuba bathwele nzima eZimbabwe, okwabulawa abantu abafika inkulungwane ezingamatshumi amabili – 20,000 ngesikhathi sombhuqazwe weGukurahundi.
Bathi udaba lolu kalukalungiswa njalo uhulumende usebophe amalunga ebandla leli etheswa amacala okungena ngenkani enkambeni yamapholisa eyeBulawayo Central Police Station lapho ababedinga khona umkhokheli wabo uMnu. Mqondisi Moyo, okwakucatshangelwa ukuba ubotshiwe.
Ukuze sihlaziye okwenzakale esigodlweni sakwele Zimbabwe kwele South Africa sixoxe loMnu. Nkululeko Gwabalanda Mathe, olandela ezombusazwe, loMnu. Joseph Tshuma, owakewamela iPelandaba Mpopoma edale lephalamende ekubandla leZanu PF.
UMathe uthi kuqondile okwenziwe ngamalunga ebandla leMRP.
Kodwa uTshuma uthi akumelanga kutshaphazwe ifulegi yelizwe.