Harare........................I- Zimbabwe imanyene lamanye amazwe awezwekazi leAfrica ekunanzeni usuku olweAfrica Day, ngesikhathi leli zwekazi libhekane lodubo lwendlala esibangwa ngamandla yimpi eyenzakala kwele Ukraine.
Ingcitshi ezicubungula inhlalakahle kazulu lezombusazwe zithi udubo oluse Africa ngolwe nkokheli okufuze iguqulwe kubekwe entsha enelisa ukuzwisisa izifiso zikazulu. Lokhu kugcizelelwe yinkokheli yamabandla ezombusazwe aphikisayo ehlukeneyo.
Eyinye yalezi ngcitshi uMnu Nkosikhona Ndlovu uthi izwekazi le Africa kumele libe le nkokheli elesineke ukuze lilungise indaba zokutholiswa kokudla e Africa.
“Ibuhlungu lindaba ngoba silenkinga yokuba indaba zokudla azikalungiswa e Africa,ikakhulu eZimbabwe. Imali ezibekwa ngu hulumende ukuthi sithole ukudla zicina zingene ezandleni zabantu abatshontshayo”
Izwekazi le Africa kuminyaka esanda kwe dlula selibe lendubo ze nkokheli engafuni ukusuka ezikhundleni kodwa kokhanya sobala ukuba iyehluleka.
Lokhu kutshiwo ngu Mnu Daniel Molokele omela iHwange Central edale le phalamende esithi kumele kube le nkokheli ethanda abantu ukuze izwekazi le Africa lingadubeki ngokudla.
“Kumele siqhubekele phambili ngo msebenzi owasungulwa yilabo abasungula I OUA ngo 1983 ukuthi kube lentuthuko lokuzibusa. Kumele inkokheli iqakathekise ukuthuthukisa isiswe babe ngabantu abalozwelo”
Lokhu kusekelwe ngu Mnu Msongelwa Ndlovu isikhumeli sebandla le ZAPU yena othe uhulumende ofana lowe ZANU PF labanye ohulumende abase Africa abenelisi ukupha uzulu ukudla ngenxa yenkohlakalo.
“ Ukuthi uAfrica akhone ukupha abantu ukudla okwakuqala yikuthi kumele senelise ukuzilimela. Kumele ohulumende baphe abantu imali yokulima. Konke okwembiwa e Africa kumele kuqale kuhluzwe kusaselapha. Yikho okuqakathekileyo ukuthi sithole ukudla”
Kodwa ilunga le ZANU PF ku Central Committee uMnu Mabutho Moyo uthi iabandla lakhe selenze okunengi ukugcwalisa izifiso zikazulu ikakhulu ngokwaba umhlabathi.
“Kuqakathekile ukuthi njenge Africa siziphe ukudla. Inhleo zika hulumende wethu ziyanceda abalima. Loba singela zulu, kuminyika esanda kwedlula abantu balakho abakutholayo ngoba uhulumende wethu uyisibonelo e Africa”
Usuku lolu lonyaka lunanzwa phansi kwe ndikimba ekhuluma ngokuqakathekisa ukuba uzulu aphiwe ukudla okweneleyo ukuze kuqedwe udubo lwe ndlala yona esibhahile kuzwekazi leli, ethi ‘Strengthening Resilience in Nutrition and Food Security on the African continent’.
Ingcitshi zithi ele Africa akumelanga lihlupheke ngendaba ezifana le ndlala kodwa okufunakalayo yikuba abantu babe lenkokheli elozwelo njalo ezwisisa izikhalazo zikazulu.
Ngesikhathi kunanzwa usuku lwe Africa Day eHarare kube lomncintiswano wamabandla ezombusazwe athi ZANU PF, CCC, NCA, LEAD le FEEZ wokunanza usuku lolu. Umcintiswano lo ube uqoqwe ngabe nhlanganiso ye 4H Foundation ulenjongo yokuletha ukuthula phakathi kwabatsha bamabandla ezombusazwe.