WASHINGTON DC - Umndeni wakoKhumalo uphoselana aqatha phezu kwembizo eqoqwa ngomunye ozithi uyinkosi yaMaNdebele uMnu. Stanley Raphael Khumalo ngempelasonto.
UKhumalo uthi uzasuka kweleSouth Africa ngoMgqibelo ekhokhela udwendwe lwezimota zezizalwane zeZimbabwe esiyabamba limbizo esigodlweni seState House koBulawayo.
Ophikisana lobukhosi bukaMnu. Stanley Raphael Khumalo, uMnu. Bulelani Khumalo, laye okuthiwa uyinkosi yaMaNdebele, uthi okwenziwa ngusowabo akukho emthethweni njalo uxwayisa uzulu ukuthi engamlandeli.
Lokhu ngokwakuqala ukuthi ababili laba bafake umehluko wabo emphakathini.
NgoMgqibelo bekulombuthano kweleSouth Africa, eBerea Park, lapho uMnu. Stanley Raphael Khumalo atshele khona izizalwane zeZimbabwe ukuthi ufuna kuvuselelwe umbuso waMaNdebele ngemva kwembizo yakhe abesegcotshwa ukuba yinkosi.
Isikhulumeli sakhe uMnu Justice Moyo utshele iStudio 7 ukuthi abalandaba lokukhulunywa ngabanye, ikakhulu labo abathi ababunanzi ubukhosi bukaStanley Khumalo.
