WASHINGTON DC - Uhulumende weZimbabwe uthi uzathatha “amanyathelo afaneleyo” alubana ethe wacelwa ngeleEthiopia ukuthi aphindisele owake waba nguMongameli walelolizwe uMnu Mengistu Haile Mariam ukuze ayebhekana lamacala akhe.
Lokhu kwaziswe ngumphathintambo obona ngobudlelwano beZimbabwe lamanye amazwe uMnu Frederick Shava ekhuluma lomsakazo weStudio 7.
UShava wethule amazwi la ngesikhathi uhulumende weZimbabwe esetheswa umlandu wokugcina umsolwa wakweleRwanda owayedingwa yilelolizwe kanye lomanyano weUnited Nations (UN) uMnu Protais Mpiranya.
UMpiranya wayesetheswa amacala okubulala kumbhuqazwe owacobodisa abantu bohlobo lwesiTutsi abafika phose isigidi, 800,000, ngo1994.
Abacubunguli beUN baze bathola ingcwaba lakhe eHarare kumalanga asanda kwedlula sokukudala wafa. Uhulumende wayesala kakhathesi uyala ukuthi wayakwazi ukuthi ungaphi.
UMengistu, yena owayebusa ngochuku, wathonisiswa yinkantolo yakweleEthiopia ngamacala atshiyeneyo evele esebalekele eZimbabwe wetheswa isigwebo sokuhlala entolongweni impilo yakhe yonke ngemva kokufunyanwa emalacala okubulala abantu abazinkulungwane ezimbili, 2000.
Ingcwethi kwezombusazwe uMnu Zenzele Ndebele utshele iStudio 7 ukuthi lanxa uhulumende weZimbabwe esithi uzathatha amanyathelo afaneleyo nxa engacelwa ngeleEthiopia, akaboni eleZimbabwe livuma ukuphindisela uMengistu.
