Ingcwethi ezihlaziya ezomnotho zithi amanyathelo ethulwe nguhulumende esithi ngawokulungisisa isimo somnotho welizwe azakwenza isimo sonakale ngamandla ngoba amabhanga esevinjwe ukunikeza izikwelede. Bathi lokhu kulakho ukubulala amabhizimusi amanengi ngoba evele esehluleka ukuthola idola leMelika emkambo owafakwa nguhulumende. Bathi amanyathelo ajezisa uzulu.
Uhulumende wethule izinqumo zokuzama ukuthi ahlenge umnotho welizwe kanye lokuthi idola leMelika litholakale lula. Kodwa, iziqondiso lezi zisolwa ngabanengi okugoqela abenhlanganiso zabosomabhizimusi ezinjengabo Confederation of Zimbabwe Industries-CZI, abomanyano wamabhanga owe Zimbabwe Banks and Allied Workers Union (ZIBAWU) labanye bethi lokhu kuzakwenza uzulu athwale nzima ngamandla.
Ukuvimba amabhanga ukuthi abolekise imali kubikwa kuzaphehla ukusetshenziwa kwemali ngaphandle kwamabhanga, kwenze ukuthi amabhanga akhweze imithelo yokusebenzisa ibhanga ngoba esethathelwe indlela zokuthola inzuzo emsebenzini wawo. Lokhu kubikwa njalo kuzakwenza amabhizimusi ehluleke ukusebenza ngoba engasenelisi ukweboleka imali emabhanga, okuzatshiya uzulu ofuna ukweboleka imali yokwelatshwa kumbe eyokubhadalela indleko zezikolo esebunzimeni obungadala ukulahlekelwa yimpilo.
Umnunzana Thabo Ndlovu ingcwethi kwezomnotho uthi abantu abathola izimali ngaphandle kwamabhanga balakho ukufihla imali zabo.
“Isingqumo sokukhweza ama withdrawal charges lama transfers amanostro accounts ngibona angani kuza affect I availability yemali ngoba abantu bayabe bengasasebenzisi amabank. Bulk of our money is coming from eGoli, abantu laba bengahamba koMukuru baphiwa imali cash, icash leyi ayingeni kumaformal system, nxa sekulamachanges istolo siyafonela u supplier abhadale ngecash. Kutsho ukuthi isupply yeCash ku interbank izaba affected.”
U-Ndlovu uqhubeke elandisa ngokunye osekungenzeka ngenxa yesinqumo sikahulumende.
"Singakhipha idual currency kutsho ukuthi akula chance yokuthi iforex ingene ku formal market. Ngibona engathi kukabili nxa singayenza imonocurrency kutsho khona ukuthi abantu bazabe beforced ukuthi betshintshe imali yabo kuyaincreaser I demand ye$ lalwana othole irtgs uzakwanisa ukuthi ayethenga idollar. Konke lokhu kuzasebenza ngokuthi uhulumende uzimisele okunganani ukuthi alandele izingqumo asezifakile.”
Umnunzana Dumisani Nkomo ingcwethi kwezombusazwe uthi izimiso ezifakwe nguhulumende zilobunzima kakhulu.
“Kuyazwisiseka ukuthi abanye abantu ade sebephambanisa beboleka imali besenza ispeculation bethole imali enengi kodwa okuqakathekileyo yikuthi nxa kulegundwane endlini kuyabe kuqakathekile ukuthi singatshisi indlu kubulawe igundwane. Nxa amabank engasakwanisi ukuthi abolekise abantu imali ama business amanengi azakufa ngoba ade edinga amabhanga ukuze aqinise ibhizimusi, uhulumende laye ethola erevenue lokuba letax entsha kuzabulala abantu sebeza fihla iforex.”
Unkosikazi Monalisa Ntini isakhamuzi sakoBulawayo uthi okwenziwa nguhulumende yikujezisa abantu abangela cala.
“Ngokunanzelela kwami siyajeziswa nje kodwa uhulumende uyakwazi ukuthi abenza lokho ngobani lamabhanga akhona, into obekumele ayenze yikuthi aqale abajezise andubana wonke umuntu afele amacala abo. Eqinisweni thina ebank asiyi njalo asisoze siye kungakalungi economy imali esiyitholayo ayidluli ebank ngakho lathi siyesaba ukuya bhadala itax ngemali esiyithole nzima.”
Uhulumende wethule izinqumo zokufaka umthetho athi uzathuthukisa umnotho welizwe ethi ukungathuthuki kwawo kubangelwa yizinto ezingalunganga ezenziwa ngabantu ukuthengisa lokuthenga idola leMelika ngemali ephezulu emkhambo omnyama kulokusebenzisa umkhambo owebhanga elikhulu lelizwe ele Reserve Bank of Zimbabwe. Kunje idola leMelika emkhambo oweRBZ lithengwa ngamadola aphansi kwamakhulu amabili amadola eZimbabwe. Kuthi emkhambo omnyama idola leMelika elilodwa lithengwa lokuthengiswa ngamadola angamakhulu aphezu kwamane awe Zimbabwe-ZW$450
Inhlanganiso ye Zimbabwe National Chamber of Commerce (ZNCC), layo yethule umbiko isola iziqondiso zikahulumende njalo isola amanyathelo athathwa ngaphambilini adala ukusilela kwedola leMelika ikakhulu lapho kulethwa iBond note.
Basola njalo uhulumende bethi amanyathelo awathathayo akakhi njalo akasebenzi okwesikhathi eside esebenza khonapho khonapho agoqela imali ezasebenza kuhlelo lokulungiswa kwemigwaqo olweEmergency Road Rehabilitation Programme, ukwakhiwa kwamadamu kanye lokubhadalela ukhetho lwamaBy elections lokubalwa kukazulu kuCensus.
